Serek Şaredarê Dêrsimî Fatîh Mehmet Maçoglu dîyar kerd ke îradeya şarê Amedî ameyo xespkerdene û eke vera tayînkerdişê qeyûman de veng nêro vetene do qeyûm bibo problemê heme partîyan
Serekê Şaredarîya Dêrsimî Fatîh Mehmet Maçoglu Amed de tewrê çalakîya roniştişî yê vera tayînkerdişê qeyûmanê 3 şaredarîyanê bajaranê girdan bibî bî. Maçoglu nêrazîbîyayîşê xo yê vera tayînkerdişê qeyûman ard zîwan ser û dîyar kerd ke o tayînkerdişê qeyûman sey xespkerdişê îradeya şarî vîneno û eke vera qeyûman de nêrazîbîyayîş nêro nîşandayene do sibaroje qeyûm bibo problemê heme partîyan.
Maçoglu da zanayene ke îradeya şarê Amedî bi rewşêka polîtîk ameya xespkerdene û va: “Lazima ganî fek no qerarî ra bêro veradayene û embazê ma tepîya agêrî karê xo ser. Neheqî bi şarê Amedî ame kerdene. Tîya de îrade esta û ma kişta na îradeye de vindenî.”
Ganî heme komeleyê demokrasî bivejîyî raşteyan
Maçoglu da zanayene ke ê her çiqas ke Dêrsim de bibî zî zerrîya înan Amed, Mêrdîn û Wanî reyde ya û wina dewam kerd: “Ma piştî danî embazanê xo. Ewro roj roja hetê yewbînan de caye girwtişî ya. Tirkîye de problemê azadî û demokrasîyeê esto. Ewro vera ma de û siba do vera sewbîna partîyêk de qeyûm bêro tayînkerdene. Ez bawer kena ke vera tayînkerdişê qeyûman de wijdanêko komekerde bibo. Ganî fek no şaşî ra bêro veradeyene. Eke ma vera tayînkerdişê qeyûman de vengê xo nêvejnî do msina demokrasî hîna teng biba û do qeyûm bibo problemê heme partîyan. Ganî heme komeleyê demokrasî yê Tirkîye vera neheqîyan de bivejîyî raşteyan. Huqûq ameyo binpaykerdene û meşrubîyayîşê na rewşe çin a. Ganî heme hêzê demokrasî kişta HDPyî de ca bigîrî.” AMED
