Badê tayînkerdişê qeyûman çalakî dest pêkerdî. Amed de çalakîya vengvetişî û padayîş û akerdişê çilayan dewam kenî
Badê ke qeyûmî tayînê şaredarîyanê bajaranê girdan yê Mêrdîn, Amed û Wanî ameyî kerdene, çalakîya vengvetişî û padayîş û akerdişê çilayan dest pêkerd. Qezaya Rezan ya Amedî de vizêr hemwelatijî saet 20.00î de çalakîya vengvetişî û padayîş û akerdişê çilayan pê ardî. Eynî saetan de grûba ke parlementera Partîya Demokratîke ya Şaran (HDP) Saliha Aydenize zî mîyan de bî, seba mîtîngê 1ê Êlule Roja Aştîye ya Dinya vilawekan vila kerdêne. Wextê vilakerdişê vilawekan de hemwelatijî bi vengvetiş û padayîş û akerdişê çilayan piştî dayî HDPyî.
Hemwelatijî balkonanê keyeyê xo ra silogano ke HDP weçînayîşê herêmî yê 31ê Adare de xebetnabî ‘Amed yê ma yo’ berz kerdî.
Qezaya Sûrî ya Amedî de HDP bi çepikan vilawekan vila kerd. Wextê vilakerdişê vilawekan de siloganê ‘Ma nêtersemî, Bêveng nêmanenî, Do roje bêra AKP hesab bido, Wayîrê îradeya xo biveje Amed’ ameyî berzkerdene. AMED
