Bi seyan cinîyî piştî dayî çalakîya roniştişî ya ke bi serkêşîya parlementeranê HDPyî û hemserakê şaredarîye vera tayînkerdişê qeyûman de dîya dest pêkerdene. Çalakîya roniştişî ewro roja 12. de dewam kena. Cinîyan çalakîya roniştişî de mesajê ‘Hemserekatî xeta ma ya mor a’ dayî
Çalakîya roniştişî ke badê tayînkerdişê qeyûmanê şaredarîyanê bajaranê girdan yê Mêrdîn, Amed û Wanî dîya dest pêkerdene roja 12. de dewam kena. Hemwelatijî Raşteyê Lîseyî de arê bîyî û siloganê ‘Ma do sere wedarnî û ser bikewî’, ‘Vera qeyûman de yewî’ û ‘Heq huqûq HDP’ berz kerdî. Parlementerê Partîya Demokratîke ya Şaran (HDP) Ayşe Acar Başaran, Remziye Tosun, Saliha Aydeniz, Feleknas Uca, Musa Farısogullari, Semra Guzele tewrê çalakîye bîyî. Sewbîna ewro Hemserekê Şaredarîya Êlihî, Kongreya Îslamo Demokratîke û heme komele û meclîsê cinîyan zî piştî dayî çalakîye.
Bi seyan cinîyî heta raşteyê çalakîye yê Lîseyê Ziya Gokalpî de roniştî û siloganê ‘Cinîî cuye azadî’ berz kerdî. Cinîyan bi çepik û tililiyan rayîrşîyayîşê xo pê ardî.
Rayîrşîyayîşî de polîsan mudaxeleya pankartê ‘Hemserekatî xeta ma ya mor a’ kerdî û nêverdayî ke cinî pankarte akerî. Polîsan eynî wext de destûr nêdayî ke rojnamegerî dîmenan biancî.
Çalakî bi tilîlî, silogan, deyr û çepikan dewam kerde. AMED
