Temsîlkarê Rêxistinê Komelê Sivîlî yê Amedî seba qêrayîşê aştîye veng dayî her kesî de 1ê Êlule Roja Aştîye ya Dinya de Raşteyê Îstasyonî de bibî
Amadekarîyê Partîya Demokratîke ya Şaran (HDP) û rêxistinê komelê sivîl yê seba mîtîngê 1ê Êlule Roja Aştîye ya Dinya kenî, dewam kenî. Do mîtîng saet 15.00î de Raşteyê Îstasyonî yê Amedî de bi siloganê ‘Seba aştîyêka rumet çareserîya demokratîke’ bêro viraştene. Seba mîtîngî taxan de esnaf û hemwelatijan rê vilawekî yenî vilakerdene.
Temsîkarê Konfederasyonê Sendîkaya Karkeranê Şorişgêrî (DÎSK) yê Amedê Mehmet Şîrîn Gurbuzî bale ant tayînkerdişê qeyûman ser û dîyar kerd ke do prosesêko winasî de tewrê kedkar û karkeran aştî biqîrî.
Qeyûm darbeya hemberê aştîye yo
Verfekê Platformê Ked û Demokrasîye Dogan Hatunî da zanayene ke do bi girseyêko gird tewrê mîtîngî bibî û va: “Ma do waştişê xo yê aştîye biqîrî. 1ê Êlule Roja Aştîye ya Dinya seba ma xeylê muhîm a. No proses de qeyûm tayînê 3 şaredarîyanê girdan ame kerdene. No proses prosesêko antî demokratîk o û hewl dîyeno ke vengê ma yê aştîye bêro puçkerdene. Qeyûm darbeya hemberê aştîye yo.”
Bi seran o polîtîkayê şerî dewam kenî
Verfekê Platformê Şûbeyê Konfederasyonê Sendîkaya Kedkaranê Rayapêroyî (KESK) Nasir Demîrkiranî zî qiseykerdişê xo de wina va: “Ma kedkar herinda butçeya şerî rê vanî butçeya kedkaran. Têkoşînê ma do no esas ser de bibo. Ma kedkarî vera şerî de yî. Bi seran o polîtîkayê şerî dewam kenî. Ma do 1ê Êlule de raşteyan de bibî.” AMED
