Hemşaredarê Bajarê Girdî yê Amedî Selçuk Mizrakliyî semedê tewrbîyayîşê mîtîngê 1ê Êlule Roja Aştîye ya Dinya veng da
Şare Amed, Wan û Mêrdînî û parlamenterê Partîya Demokratîke ya Şaran (HDP) yê ke bi rojan o kuçeyan de vera xespkeridşê îradeyî çalakîyan de yê hetêk ra zî amadekarîya 1ê Êlule kenê. Hemşaredarê Bajarê Girdî yê Amedî Selçuk Mizrakliyo ke ANFyî rê qisey kerd, semedê tewrbîyayîşê mîtîngê Amedî veng da.
Mizrakliyî vist vîrî ke emser 1ê Êlule Roja Aştîye ya Dinya rojanê ke derbeya sîyasîye ameye kerdene de yeno pêşwazîkerdene û va: “1ê Êlule vera heme neheqîye, bêhuqûqîye û derbeyanê sîyasîyan do bibo roja têhetameyîş û xoverdayîşê şarî yo ke tim biqerar semedê haştîye mucadele keno.”
Mizrakliyî wina va: “Tena 1ê Êlule nê ganî 364 rojî Tirkîya de roja haştîye bî û vernîya gonî û hesiran bêro girewtene. Ma yê ke semedê şerî nê semedê haştîye mucadele kenê, ma do a roje meydanan de semedê haştîye bigêrê. 1ê Êlule de ma do rixmê heme şertenê zehmetan û tarîtîye leteyêkê roşnayîye bê. Kam ke wazeno tarîtîye biaçarno ronayîye, heme kulikê adirî ganî verê xo bidê meydanê mîtîngî. Ma 1ê Êlule de şarê xo Meydanê Îstasyonî de pawenê.” AMED
