Şêniyên komelgeha Şaryayê xwestin ku hemû aliyên siyasî yên çar parçeyên Kurdistanê bibin yek û bi yekitiya neteweyî bersivê bidin dijminên kurdan
Welatiyên komelgeha Şarya ya ser bi bajaroka Sêmêl a Dihokê ve der barê yekitiya neteweyî ya gelê kurd de axivîn. Welatiyan destnîşan kir ku kurd dikarin bi yekitiya xwe bersivê bidin dijminên xwe.
Têkildarî mijarê ji çalakvanên civaka sivîl Dexîl Meto anî ziman ku divê hem di nava aliyên siyasî û hem jî di nava gel de hevdûqebûlkirin çêbibe û yekitiya navxweyî were avakirin.
Her wiha rojnameger û aktivîst Basim Qasim jî nêrînên xwe anîn ziman û wiha got: “Pêwîstiya kurdan bi yekgirtinê heye. Êşa her parçeyeke Kurdistanê, di heman demê de êşa her çar parçeyên din e. Ji bo vê jî divê gelê kurd hîn zêdetir berxwedan bike û bi yekgirtinê bersiva dijminan bide.”
‘Divê rewşenbîr pêşengiyê bikin’
Der barê mijarê de muzîkjen Qewalî Şengalî jî wiha got: “Divê nivîskar, helbestvan û rewşenbîr bi rêya huner û nivîsên xwe pêngavek baş bavêjin û bikarin pêşengtiyê ji yekitiya neteweyî re bikin.” SILÊMANÎ
