Hemşaredaranê HDPyî yê ke bi qeyûman cayê înan ameyî xespkerdene, şaredaranê Ewropa rê mektube şawitî
Hemşaredarê Bajarê Girdî yê Amedî Adnan Selçûk Mizrakli, hemşaredarê Bajarê Girdî yê Mêrdînî Ahmet Turk û hemşaredara Bajarê Girdî yê Wanî Bedîa Ozgokçe Ertane yê ke raştê derbeya qeyûmî ameyî şaredaranê Ewropa rê mektube şawitî.
‘No qerar derbeyêka hukmatî ya’
Mektuba ke sere de Barcelona, Parîs, Londra, Stockholm, Oslo, Roma, Mîlano, Venedîk şaredaranê Ewropa rê ame şawitene de bale ame antene muhîmîya şaredarîyanê Amed, Wan û Mêrdînî ser û ame vatene ke nê bajarê ke 3,8 mîlyon kesî dete ciwîyenê qelayê Partîya Demokratîke ya Şaran (HDP) yê.
Mektube ra tayî cayî wina yê: “Weçînitişê 31ê Adara 2019î de ma bi rayana zêdan na serekîya nê şaredarîyan girewte la rixmê naye 19ê Tebaxe de qeyûm herinda ma de ame cakerdene û ma wezîfeyê xo ra ameyî dûrfînayene. Meclîsê şaredarîyanê ma bi qerarê keyfî ameyî vilakerdene. Ma nê qerarî sey derbeya hukmatî vînenê. No nimûneyo peyên ê hêrişê rejîmê Erdoganî yê vera kurdan o.
‘Qeyûma şaredarîyê ma talan kerdî’
Hewldayîşê derbeya 15ê Temmuza 2016î ra dima hemserekê ma yê pêroyî yê o wextî Selahattîn Demîrtaş û Fîgen Yuksekdage, parlamenter û hemşaredarê ma bîlaheq, bêhuqûqî ameyî tepiştene. 102 şaredarîyanê ma ra 95ine rê reyna qeyûm amebi tayînkerdene. Mabênê 2016-2018 de qeyûman şaredarîya ma kerdî deyndar, talan kerdî.
‘Mucadeleyê ma yê aştîye do ser bikewo’
Hukmat sebebê qeyûmî sey terorî ramojneno la xora heme dinya zana ke goreyê Erdoganî kam ke kişta ey de nêyo o terorîst o. Reyna şaro ke wayîr îredayê xo vejîyeno raştê hêrişê polîsan yeno. Ma tîya pîya bi şarê xo rixmê heme hêrişan xover danê. Eke şima paştî bidê ma, ma naye ra hêz gênê. Ma paştdayîşê şima ra keyfweş benê. Welatê ma de şertî senî çetin benê wa bibê ma do mucadeleyê aştîye û edaletî de ser bikewê.” ANQARA
