Temsîlkaranê dezgehanê Elewîyan yê ke vera xespkerdişê şaredarîyanê Amed, Wan û Mêrdînî reaksîyon ramot, qeyûmî sey derbeya sîyasîye name kerdî
Temsîlkaranê dezgehanê Elewîyan yê ke şaredarîyê partîya Demokratîke ya Şaran (HDP) zîyaret kerdî û paştî daye ci, hemverê qeyûman de mesajê xurtkerdişê mucadeleyî dayî.
Hemserekê Komeleya Elewîyan ya Demokrtatîke (DAD) Mûstafa Karabûdakî vist vîrî ke Elewîyî qeyûmî zaf hol nas kenê û va: “Qeyûm asîmîlasyon o, şîdet o, xebatêko bêriza yo. Ma îtîqatê xo de qeyûmî wina tarîf kenê. Îqtîdaro sîyasî Amed, Wan û Mêrdînî de çîyo ke sandiq de dest nêfîna bi qeyûman wazeno bîgêro. Ma Elewîyî cimatê riza yê. Elewîyî zîhnîyeto ke îradeyê şarî xesp keno, çi rey qebûl nêkerd. Ma kişta şarî û hemşaredaranê ke ameyî weçînayene de yê.”
Hetkarê serekê pêroyî yê Federasyonê Elewî Bektaşî (ABF) Muslum Metînî zî vera qeyûman razînêbîyayîşê xo ard ziwan û va: “Ma sey ABF kam ke raştê neheqîye ameyo, kam beno wa bibo ma cayê ey de yê.”
Serekê pêroyî yê Komeleya Kulturî ya Pîr Sûltan Abdalî (PSAKD) Ganî Kaplanî zî vist vîrî ke Elewîyan tarîxî ra qeyûman ra zaf antê û va: “Elewîyî qetîyen cayê qeyûman de ca nêgenê. Qeyûmî vera îradeyê şarî xesp û hêriş ê. Qeyûm derbeyeka sîyasî ya. Ganî ca de wezîfeyê şaredarîyanê ke hetê şarî ra ameyî weçînitene peyser bêrê dayene. No tradîsyonê derbeye yo û ma nê qebûl nêkenê.”
Endamê Merkezê Komeleya Pîr Sûltan Abdalî Ozgur Kaplanî zî bale atne hêrişê vera Elewîyan û va: “Bi seyan serran o ke vera cuya ma hewldayîşê qeyûmî esto. Tewirê îradeyê şarî nasnêkerdişî yê AKPyî rê ne Kurdî ne zî Elewî xerîb nêyê. Ma serê qoqanê xo de sey şarê ke bianor rayra şinê. AKP yo ke peynîya ci bîya nêzdî bi nê hêrişan wazeno ke emrê îqtîdarê xo yê sîyasîyî derg bikero.” DÊRSIM
