Hevserokên HDP’ê bi daxuyaniyekê bal kişand ser rewşa nediyar a Selahattîn Demîrtaş. Di daxuyaniyê de hate gotin ku dadgehê bi yekdengî biryara berdanê daye û ji bo ku bêhiqûqiya heyî ji holê rabibe divê gavên pêwîst bên avêtin
Hevserokên Partiya Demokratîk a Gelan (HDP) Pervîn Buldan û Sezaî Temellî têkildarî rewşa hevserokê HDP’ê yê berê Selahattîn Demîrtaş daxuyaniyek dan. Di daxuyaniyê de hevserokan xwestin ku demildest wekîl û hilbijêrê wan ê girtî bê berdan
Di daxuyaniyê de hevserokan bertek nîşanî rewşa nediyar a Demîrtaş dan û ev tişt parve kirin: “Doza ku Selahattîn Demîrtaş jê dihate darizandin bi yekdengî biryara berdanê hatiye girtin lê li ser rewşê nediyarîbûnek heye. Li şûna ku divê Demîrtaş bê berdan, niha bi ser îtiraza dozger a ji bo dadgeha jortir dixwazin dem bidest bixin.”
Biryara DMME’yê
Hevserokên HDP’ê bal kişand ser biryara Dadgeha Mafên Mirovan a Ewropayê (DMME) û wiha bi dawî kir: “Li holê biryara DMME’yê heye. Li holê her çendî direng jî mabe biryara yekdengiyê ya berdanê jî heye. Li şûna îtiraza dozger a ji bo dadgeha jortir divê biryar bê bicihanîn.”
Divê gavên pêwîst bên avêtin
Daxuyanî wiha bi dawî bû: “Em careke din bibîr dixin ku bêyî ku serlêdana îtirazê biçe dadgeha jortir, divê Demîrtaş bi lezgînî bê berdan. Ji bo ku bêhiqûqiya heyî bi dawî bibe divê demildest gavên pêwîst bên avêtin.” ENQERE
