Girtî Sabrî Kaya yê nexweşîna giran a dil pê re heye da zanîn ku her roja diçe rewşa wî nebaş dibe û dixwaze cezayê wî bê taloqkirin
Girtiyê nexweş Sabrî Kaya yê dilê wî ji sedî 25 dixebite û li Girtîgeha Jimara 2’yan a Tîpa T a Osmaniyeyê tê girtin nameyek Komeleya Mafên Mirova ya Edeneyê re şand û qala rewşa xwe û binpêkirina mafan kir. Kaya yê di 2008’an de tê girtin 10 sal ceza lê tê birîn.
Kaya di nameya xwe de diyar dike ku dozger û dadgerê wî dane girtin niha ji FETO tên girtin. Kaya da zanîn ku di sala 2010’an de ji ber stresê qeyrana dil derbas dike û 3 qapaxên dilê wî pûç bûne. Kaya anî ziman ku dixtoran jê re gotiye ku “rîska mirinê bi te re heye û divê demildest emeliyat bibe” û roja dê emeliyat bibûya bi 10 hevalên xwe re sirgunî Girtîgeha Tîpa F a Kirikkaleyê tê kirin û 2 meh li vir tê tecrîdkirin. Kaya got ku li gel ew çend caran emeliyat bûye jî rewşa wî baş nebûye û nexweşxaneyan rapora tenduristiyê ya rewşa wî nebaş dide nîşandan nedanê. Kaya diyar kir ku ew du caran di wesayîta rîngê de qeyrana dil derbas kiriye û li gel nexweşîna dil gelek nexweşînên din jî hene. Kaya da zanîn ku rewşa wî qet nebaşe û ji ber pirsgirêkên wî yên nexweşînê didomin xwest cezayê lê hatiye birîn were taloqkirin. EDENE
