Şandeya HDP û KCD’ê ku jî bo rêzehevdîtinên bi rayedarên Herêma Kurdistanê û partiyên siyasî re çûn başûrê Kurdistanê, gihiştin Hewlêrê
Şandeya ku ji hevserokê Partiya Demokratîk a Gelan (HDP) Sezaî Temellî, hevserokê Kongreya Civaka Demokratîk (KCD) Berdan Ozturk, wekîla Serokê Koma HDP’ê ya Parlamentoyê Fatma Kurtulan û alîkarê Hevserokên Giştî yên HDP’ê Nazmî Gur pêk tê, di van kêliyan de gihîşt balafirgeha Hewlêrê.
Şande li balefirgehê ji aliyê parêzgehê Hewlêrê Newzad Hadî, berpirsê Pêwendiyên PDK’ê Elî Hisên, parlamentera HDP’ê ya Êlihê (Batman) Feleknas Uca ku ev çend roje li başûrê Kurdistanê ye û hevserokên Nûnertiya HDP’ê ya Herêma Kurdistanê Muzeyen Guneş û Abid Îke ve hate pêşwazîkirin.
Şande demekê li balefirgehê bi Newzad Hadî re sihbet kir û piştre jî Sezaî Temellî têkildarî serdana xwe ya herêmê pirsên rojnamevanan bersivandin. Şandeya ku Feleknas Uca, Muzeyen Guneş û Abid Îke jî tev li bûn, dê derbasî bajaroka Mesif a Hewlêrê ku ofîsa Barzanî lê ye bibe û bi Serokê Giştî yê PDK’ê Mesût Barzanî re hevdîtinê bike.
Di çarçoveya serdana herêmê de şandeya HDP û KCD’ê dê sibe jî bi serokê Herêma Kurdistanê Nêçîrvan Barzanî re hevdîtinê bike. Her wiha dê li Hewler û Silêmaniyê jî rêzehevdîtinan pêk bînin. HEWLÊR
