Derbarê 3 cendirmeyên ku îşkence li gundiyan kiribûn de li şûna ‘Îşkence û memeleya xerab’ di çarçoveya peywirê de ‘derbaskirinas sînorê bikaranîna rayeya zorê’ doz hat vekirin
Di 17’ê Kanûna 2018’an de li nêzî gundê Babexê yê navçeya Hênê ya Amedê polisek hatibû kuştin. Piştî kuştina polis, cendirmeyên Fermandariya Cendirmeyan a Navçeya Hênê bi ser gundê Şelê yê nêzî gundê Babexê de girtibûn, gundiyên bi navê Alî Îhsan, Abdûlsamet, Ayhan Opçîn û Tûncay Opçîn binçav kiribûn û di bin çavan de îşkence û memeleya xerab li wan kiribûn. Ev yek bi rapora tenduristiyê jî hatibû tespîtkirin. Lê di doza ku piştî serlêdana her çar gundiyan hat vekirin de derbarê cendirmeyên bi navê Hasan Huseyin Y., Mevlud T. û Mûrat S. de li şûna ‘îşkence û memeleya xerab’ di çarçoveya peywirê “derbaskirinas sînorê bikaranîna rayeya zorê’ de angaştname hat amadekirin.
Di angaştnameya ku ji aliyê Serdozgeriya Komarê ya Hênê ve hatiye amadekirin de, li gel tespîta îşkenceyê ya bi rapora tenduristiyê jî tê gotin ku her çar kes jî bi awayekî hêsan birîndar bûne. Di angaştnameyê de tê diyarkirin ku her sê cendirmeyan îşkenceya ku kirine red kirine û vê hinceta wan a îşkenceyê tê vegotin; ji ber ku hewa bi şilî, cihê hatin girtin bi kevir û li dijî girtinê derketin û reviyan birîndar bûne.
Di angaştnameyê de ji ber sûcê ‘derbaskirinas sînorê bikaranîna rayeya zorê’ di navbera 6 meh û salekê de ceza girtîgehê ji her sê bersûcan re hat xwestin. Angaştnameya ku hat amadekirin ji aliyê Dadgeha Cezayê ya Asliyeya Sûlhê ve hat qebûlkirin. AMED
