Keyeyanê Hidir Çalli û Taylan Kutlarî yê ke 10ê temmuze de qezaya Pulurî ya Dêrsimî de pêkewişêk de cuya xo vindî kerdbî, cenazeyanê xo waştî
Keyeyê Hidir Çalli û Taylan Kutlarî ke 10ê temmuze de qezaya Pulurî ya Dêrsimî de pêkewişêk de cuya xo vindî kerdbî, Komeleya Heqê Merdiman (ÎHD) ya Stenbolî de eşkerayîyêk dayî û cenazeyê xo waştî.
Eşkerayîya ke parlamenterê Partîya Demokartîke ya Şaran (HDP) yê Stenbolî Mûsa Pîroglu û Dayîkê Şemeyî zî tewrê ci bîyî verî avûkatanê keyeyan ra Sezgîn Uçarî qisey kerd. Uçarî bala ante cenazeyê ke nêdîyenê keyeyan ser û va: “Cenazeyê ke Goristanê Garzanî ra ameyî girewtene hema nêdîyayî. No nimûneyêk o. Di mengî yo muwekîlanê ma cuya xo vînî kerde la hema cenazeyî nêdîyayî keyeyan. No cenaze rê îşkence yo. Huqûqê Tirkîya û mîyanneteweyî yeno binpaykerdene.”
Reyna qiseykerdoxê bînan zî polîtîkaya dişmenkî yê vera cenazeyan rexnê kerdî û vatî no çîyêko teberê merdimîye yo û nêno qebûlkerdene.
Bado zî eşkerayîye ame wendene û eşkerayî de nê ameyî parekerdene: “Dimayê xeberê şehdatî keyeyan pîya bi avûkatan muracatê Dezgeyê Tibê Edlî yê (ATK) Meletî kerd û semedê DNA nimûne da. La mengêk ra dima ame vatene ke bi nimûneyê wayûbirayî nêbeno ganî dadî û babî gonî bidê. Gonîdayişê dadî û babîyan ser ra zî mengêk ravête la heme cenazeyî nêameye dayene. Nê di mangan de ma mabênê Dezgeyê Tibê Edlî yê (ATK) Meletî, edlîyeya Dêrsimî û Dezgeyê Tibê Edlî (ATK) yê Stenbolî de şîyê-ameyê. Xora dejê dadîyan xorî yo, na rey zî cenaze nêgiretiş xo na ser a. Ganî nê astengîye werte ra bêrê wedartene û cenazeyî ca de teslîmê keyeyan bibê .” STENBOL
