Hêzên artêşa tirk piştî pevçûna duh, li navçeya Mahsertê qedexeya derketina derve ragihand. Hat zanîn ku piştî ragihandina qedexeya derketina derve li herêmê şewat derket û şewat her ku diçe berfireh dibe
Li herêma gundê Omeriyan a navçeya Mahsertê ya Mêrdînê, duh komên tevgera taybet ên polîs û cendirmeyan bi tevlêbûna cerdevanan operasyon li dar xist. Di operasyonê de pevçûn derket. Di pevçûnê de cerdevanek birîndar bû û midûrê Şaxa Hêzên Taybet ê Polîsan ê Mêrdînê Tufan Kansuva jî hate kuştin.
Piştî pevçûnê li gundên Cînata Muho, Cînata Hiso yên navçeya Nisêbînê û li gundên Yastê û Haciya yên navçeya Mahsertê qedexeya derketina derve hate ragihandin. Bi ragihandina qedexeyê re jî li van gundan şevê din şewat derket. Hat zanîn ku şewata li van gundan her ku diçe mezin dibe û şewat heta gundên Kewarêx, Xanêsora û Xirbê Mamîtê yên Mahsertê berbelav bûye.
Şêniyên herêmê ji ber qedexeya derketina derve, nikarin mudaxaleyî şewatê bikin. MÊRDÎN
