Çalakiya Dayikên Aştiyê yên Mexmûrê ya ji bo rakirina dorpêça hêzên PDK’ê ya li ser Wargeha Penaberan a Mexmûrê di roja 12’emîn de berdewam e. Dayikan destnîşan kir ku heta ku dorpêç bi dawî dibe dê çalakiya xwe berdewam bikin
Di 17’ê tîrmeha 2019’an de li restoranta Hoqabaz a li Hewlêrê berpirsyarê MÎT’ê yê başûrê Kurdistanê Osman Kose hate kuştin. Piştî vê bûyerê Wargeha Penaberan a Şehîd Rûstem Cûdî (Mexmûr) careke din bû hedefa rêveberiya başûrê Kurdistanê û hate dorpêçkirin. Dorpêça li ser wargehê di roja 57’emîn de jî berdewam dike.
Ji bo rakirina dorpêça li ser wargeha Mexmûrê, Dayikên Aştiyê yên Mexmûrê li ber avahiya hêzên asayîşê ya PDK’ê ya li ser rêya di navbera Mexmûr û Hewlêrê de dest bi çalakiya rûniştinê kiribû. Dayikên Aştiyê tevî hemû şert û mercên giran jî berxwedana xwe di roja 12’emîn de berdewam dikin. Dayikên Aştiyê yên Mexmûrê şev û rojên xwe li cihê çalakiyê derbas dikin.
Tevî vê yekê jî heta niha rayedarên hikûmeta başûrê Kurdistanê tu bersiv nedane Dayikên Aştiyê. Dayik dibêjin ku heta ku dorpêça li ser wargehê bi dawî dibe dê çalakiya xwe bi israr berdewam bikin. MEXMÛR
