Keyeyê endamê HPGyî Mîkdat Ordeyo (Harûn Delal) ke 6ê tebaxe de cuya xo vindî kerdbî, 7ê tebaxe de cenazeya Harûn Delalî teşhîs kerd û cenazeya xo waşt. Labelê no 35 rojî yo ke hema zî cenaze nêdîyaya keye. Datîza Yilmaz Ordeyî da zaneyene ke dozger înan rê vato ‘Şima nika aşme bikerî di parçe zî ma cenaze nêdanî’û heqaret bi keye kerdo
Endamê HPGyî Mîkdat Ordeyo (Harûn Delal) dewa Miquriyan ya qezaya Hênê ya Amedî ra yo û serra 2013î de tewrê sefanê PKKyî bîyo. Ordeyî 6ê tebaxe de qezaya Geverî ya Colemêrgî de cuya xo vindî kerd. Keyeyê Ordeyî badê ke xebere girewt 7ê tebaxe de şî qezaya Gever û Colemêrgî û morg de cenazeya xo teşhîs kerd. Keye 7ê tebaxe de zî seba testê DNAye numuneyê gonî da û muracatê Şûbeyê Colemêrgî yê MEBYA-DER û ÎHDyî kerd û waşt ke cenazeya xo bigîro.
Datîzayê Mîkdat Ordeyî, Yilmaz Orde dîyar kerd ke seba teşhîskerdişê cenaze şîyî morgê Nêweşxaneyê Colemêrgî û wina va: “Ma şîyî Colemêrg û cenaze teşhîs kerd. Ma seba herînayîşê cenaze muracat kerd. Keye ra ma3-4 kesî şîyî û cenaze teşhîs kerd. Ma va ‘Ma cenaze teşhîs kerd, şima qey nêdanî?’ Ê vatî ‘Şêrêne Stenbol û seba testê DNAye gonî bidêne.’ Ma şîyî Stenbol û seba testê DNAye gonî da. 35 rojî yo ke cenaze nêdîyeno ma.”
Datîza Yilmaz Ordeyî ard vîr ke serê waştişê wezîfedaranê Dezgeyê Tibê Edlî (ATK) yê Colemêrgî 4ê êlule de şîyî Stenbol û muracatê Dezgeyê Tibê Edlî (ATK) yê Stenbolî kerdî, labelê muxatab nêvînayî û reyna tepîya agêrayî.
Dozger ma rê va ‘Şima nika aşme bikerî di parçe zî ma cenaze nêdanî’
Yilmaz Orde dîyar kerd ke zilm û ezîyet bi înan yeno kerdene û tewr peynî wina va: “Ma tepîya erşawitî Stenbol û vatî ‘Heta ke netîceyê testê DNAye nêvejîyo ma cenaze nêdanî.’ Ma 4ê êlule de netîceyê testê DNAye musayî. Labelê reyna zî cenaze nêdîyeno ma. Ê ma xapênenî. Wexto ke ma şîyî Colemêrg û agêrayî polîsan ma taqîp kerdî û waştî ke ma bitersnî. Xora datîzayê mi şehîd bîyo, hedefê înan oyo ke keye perîşan bikerî. Ma aciz nêbenî. Ma payan ser de yî. Ma şehîdanê xo dima yî. Şehîdê Kurdistanî pêro şehîdê ma yî. Ma şîyî verê dozger, labelê dozger ma rê va ‘Şima nika aşme bikerî di parçe zî ma cenaze nêdanî’ û heqaret bi ma kerd. No zilm o. Dewlet zilm bi ma kena. Faşîzmê AKP û MHPyî zilm b ima kenî. Ma bi îrade yî. Rayîrê ma dîyar o.” AMED
