Hemseraka KCDyî û Parlamentera HDPyî ya Colemêrgî Leyla Guvene seba ke derheqê keyeyanê ke vernîya banê HDPyî yê Amedî de roniştê de qisey kerdo derheqê ci de cipersayîş ame destpêkerdene
Serdozgerîya Komere ya Amedî derheqê Hemseraka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene de seba ke derheqê keyeyanê ke vernîya banê HDPyî yê Amedî de roniştê de qisey kerdo cipersayîş da destpêkerdene.
Guvene qiseykerdişê xo de wina vatbi: “Dayîkê ke uca ronişenê zî dayîkê ma yê. Dayîkî bimbarekê ma yê. Ma înan ra çîyêk nêvanê. Dayîkî ganî semedê ardişê haştîye tê bigêrê. Ewro di dayîkan rayapêrîye ra ozrê xo waşt û peyser ancîyayî. No do dewam bikero, cinkî sebebê şerî HDP nîyo. Zîhnîyeto ke meselaya Kurdî bêçare verdeno, şerî o vejeno. Heta ke no dewam bikero do tewrbîyayîşê gerîlayî zî bibo, şer zî bibo, pêkewtişî zî bibê… HDP seba ke nê heme werta ra bêrê wedartene mucadele keno. Dayîkî ganî çareserîye yê ke şer wazenê berê înan de bigêrê. HDP roja ronayîşê xo ra semedê haştîye xebityeno.” AMED
