Berxwedana Dayikên Aştiyê yên Mexmûrê ya ji bo rakirina dorpêça li ser Wargeha Mexmûrê, di roja 16’emîn de didome. Li dijî dorpêça ku di roja 61’emîn de didome de, dayik bi israr li ber xwe didin. Hikûmeta Başûr li hemberî daxwazên dayikan xwe li bêdengiyê datîne
Dorpêça Hikûmeta Herêma Federal a Kurdistanê a li ser Wargeha Penaberan a Şehîd Rûstem Cûdî (Mexmûr) di roja 61’emîn de berdewam dike. Ji bo rakirina vê dorpêçê, Dayikên Aştiyê yên Mexmûrê tevî şert û mercên dijwar jî 16 rojin li ber noqteya hêzên asayîşê yên girêdayî PDK’ê ku di navbera Hewlêr û Mexmûrê de ye, di çalakiyê de ne. Dayikên Aştiyê yên Mexmûrê şev û rojên xwe li wir derbas dikin.
Heta niha rayedarên hikûmeta Herêma Kurdistanê tu bersiv nedana dayikan. Dayik diyar dikin ku heta ku dorpêç bi dawî nebe dê çalakiya wan jî bi dawî nebe. Herî dawî Saziya Tendirustiyê ya Wargeha Penaberan a Şehîd Rûstem Cûdî (Mexmûrê) bi daxuyaniyekê ragihand ku êdî di peydakirina dermanan de astengî derketine û dermanên pêwîst nayên peydakirin.
Şande hate astengkirin
Ji bo piştgiriya bi dayikan re, şandeyeke ji Meclisa Gel, Meclisa Îştar û Şaredariya Wargeha Mexmûrê di 14’ê îlonê de xwestin biçin serdana dayikên di çalakiyê de. Lê şande ji hêl hêzên asayîşê ve hate astengkirin.
Nahêlin bijîşk bikevin wargehê
Rewşa gelek nexweşên li Mexmûrê roj bi roj girantir dibe û hikûmeta herêmê destûrê nade ku tu bijîşkên pispor derbasî herêmê bibin. Ev yek jî rê li ber fikarên mezin vedike ku bi xwe re karesatên giran bîne. MEXMÛR
