Kitabo yewin yê kurdkî yê hetkarîya lezkanî bi nameyê ‘Alîkarîya Destpêkê’ ame weşanayene
Dr. Erdal Sîpano ke bi nameyê ‘Alîkarîya Destpêkê’ kitabo yewin yê hetkarîya lezkanî yo bi kurdkî amade kerdo, vat seba ke bi ziwanê dayîke xizmetê weşîye nênê dayene mabenê doxtor û nêweşan de yew têkilîyo xurt nêbeno û nêweşî hetê heqanê nêweşan ê zanayîşanê rastikênan û tedawî ra yenê astengkerdene.
Kitabê ‘Alîkarîya Destpêkê’ yo ke kitabo verên ê hetkarîya lezkanî yo ke bi kurdkî hetê Dr. Erdal Sîpanî ra ameyo nuştene, weşanxaneyê Sitavî ra vejîya. Dr. Erdal Sîpano ke 10 serrî ra nata warê ‘nêweşîyê zerrîye’ de pispor o vat seba ke na babete de zaf kêmîtî bîyê qerar dayo ke kitabêko winasîn binuso. Kitab bi ziwanêko asan û pê dîyayîşkîyan ameyo nuştene. Resimê kitabî hetê ressam Ercan Altuntaşî ra ameyî xêzkerdene. Sîpano ke derheqê weşîye de meqaleyanê bi kurdkî zî nuseno îfade kerd ke ganî Kurdkî bibe ziwanê xizmetî.
‘Weşîya bi ziwanê dayîke cuye ya’
Dr. Sîpan ard vîrî ke sey her cayî de nêweşxaneyan de zî kurdkî yena astengkerdene û îfade kerd ke eke xizmetê weşîye bi ziwanê dayîke nêro dayene mabenê doktor û nêweşan de têkilîyêko xurt peyda nêbeno, nêweşî bi hewayêko xelet yenê zanayîşdayene û heqê tedawîyê nêweşan yeno astengkerdene. Sîpanî ard ziwan ke rîyê asîmîlasyonanê dewlete yê vera ziwanê kurdî ra merdiman bi serran nêşikîyayê derdê xo bi ziwanê xo doktoran rê vajî. Sîpanî vat ke na rewşe hema zî dewam kena. Dr Sîpan ke vano ‘Weşîya bi ziwanê dayîke cuye ya û veng dano kedkaranê weşîye ke wa wayîrê ziwanê xo vejîyê û sebe na babete xîret bikê.
