Li Nisêbînê û Artukluyê polîsan ji malbatên zarokên wan tevlî PKK’ê bûne xwestin biçin ber HDP’a Amedê. Malbatan ji polîsan re got: “Kesî zarokên me bi zorê nebiriye.”
Li ber avahiya HDP’a Amedê bi organîzeya polîs û AKP’ê rûniştina malbatan a bi îdiaya “HDP’ê zarokên wan şandiye çiyê” berdewam dike. Li gelek bajaran polîs zext li malbatên zarokên wan tevlî PKK’ê bûne dike û ji malbatan dixwazin biçin ber HDP’ê rûnên. Li navçeya Nisêbînê û Artuklû yên Mêrdînê hin kesên xwe wekî polîs dan nasîn ji malbatan xwestin biçin ber HDP’a Amedê.
Di rojên derbasbûyî de 2 polîsên jin diçin malbatek li Nisêbînê û bêyî tu biryar di destê wan de hebe li malê lêgerîn pêk tînin. Li gorî malbat radigihîne, polîsan ji wan re gotiye: “Heke hûn dixwazin keça we paş ve were biçin ber HDP’ê. Hûn jî tevlî malbatan bibin.” Lê malbatê bersiva polîsan da û wiha got: “Keça me li ser daxwaza xwe çûye. Kesî keça me bi darê zorê nebiriye çiyê.” Li ser bersivdayîna malbatê polîs neçar man ji malê biçin.
‘Em ê we bi taksiyê bibin’
Malbatek li navçeya Artuklûyê jî da zanîn ku polîs bi telefonê li wan geriyane û ji wan xwestine biçin ber HDP’ê û zarokên xwe ji wan bixwazin. Malbatê ragihand ku polîsan ji wan re gotiye: “Heke hûn biçin em ê we bi taksiyê bibin heta wir. Wê li wir her pêdiviyê we ji aliyê dewleta me ve bê pêşwazîkirin. Wê ewlehiya we jî bigirin. Meraq nekin.”
Malbatê ji polîs re wiha dibêje: “Kesî zarokê me bi zorê nebiriye. Ew li ser daxwaza xwe çûye. Niha dijîn an najîn nizanim.” MÊRDÎN
