Berxwedana Dayikên Aştiyê yên Mexmûrê ya li dijî dorpêça PDK’ê ya li ser wargeha Mexmûrê didome. Di roja 18’emîn a çalakiyê de Nasir Yagiz û Herêm Mehmûd jî dayik ziyaret kirin û piştgirî dan
Dayikên Aştiyê yên Mexmûrê li dijî dorpêça hêzên PDK’ê ya li ser Wargeha Penaberan a Şehîd Rûstem Cûdî (Mexmûr) li ber xwe didin. Dorpêça PDK’ê ya li ser wargeha Mexmûrê di roja 63’yemîn de berdewam dike. Li dijî vê dorpêçê jî dayikên Mexmûrê 18 roj in li ber noqteya hêzên asayîşê ya di navbera Mexmûr û Hewlêrê de li ber xwe didin.
Di roja 18’emîn a berxwedanê de endamê Meclisa Nûnertiya Partiya Demokratîk a Gelan (HDP) a Hewlêrê Nasir Yagiz ku 187 rojan û endezyar Herêm Mehmûd ku 91 rojan ji bo rakirina tecrîda li ser Rêberê Gelê Kurd Abdullah Ocalan di greva birçîbûnê de mabûn, serdana çalakiya dayikan kirin û piştgiriya xwe ji bo çalakiya wan anîn ziman.
Hêjayî bibîr xistinê ku endama Koordînasyona Meclisa Îştar a Mexmûrê Fadîle Tok ku ew ji li dijî tecrîda li ser Ocalan 126 rojan ketibû grevan birçînê ya bêdem û bêdorveger, ji bo piştgiriya Dayikên Aştiyê beşdarî çalakiyê bûye. Tok li cihê çalakiyê berxwedana xwe didomîne. MEXMÛR
