Mehkemeya doza Selahattîn Demîrtaşo ke rehîn yeno tepiştene, Daîreya Dadgeran ya Pîlan ya Mehkemeya Heqanê Merdiman ya Ewropa (MHME) de ameye dîyene
Doza Hemsereko verên yê Partîya Demokratîke ya Şaran (HDP) yo tepişteyî Selahattîn Demîrtaşî Daîreya Dadgeran ya Pîlan ya Mehkemeya Heqanê Merdiman ya Ewropa (MHME) de ameye dîyene. Tewrê Hemserekê Pêroyî yê HDPyî Sezaî Temellî heyetêkê partîye, cinîya Demîrtaşî Başak Demîrtaşe û heyetê CHPyî ke parlamenter Sezgîn Tanrikulu zî tede bi, mahkeme taqîb kerdî.
Mahkeme de avûkatanê Demîrtaşî Prof. Dr. Başake Çali, Dr. Kerem Altiparmak, Mahsûnî Karaman, Denan Molu, Ramazan Demîr û Aygule Demîrtaş, Demîrtaşî pawit. Avûkatan vat Demîrtaş seba ke têkilîya mabênê Rayberê PKKyî Abdullah Ocalan û selahîyetdaranê tirkî de ser bikewê rolêk girewt xo ser. Avûkatan dîyar kerdî ke Îqtîdarî bi zanayîş Demîrtaş kerdo hedef û Demîrtaş xebatanê polîtîkan ra ame dûrfinayene. Avûkatan va: “Erdogan waşt û dima ra fezleke ame amadekerdene.” Derbeya 4ê Teşrîna Peyêne mojnaye û ame vatene ke pê fermanan sereştişî ameyî kerdene.
Komîserê Heqanê Merdiman yê Konseyê Ewropa Dunja Mîjatovîc beşdarê mahkeme bi û qisey kerd. Mijatovîc îfade kerd ke Tirkîya de xoserîya huqûqî bîya xêra û huqûq verba muxalîfan bîyo mekanîzmaya tersnayîşî. Komanê Sosyalîst û Keskan ra nêzdîya 20 parlamentî yê Parlamentoyê Ewropa zî mahkeme taqîb kerdî. STRASBOURG
