Parlementera HDPyî û Hemsereka KCDyî Leyla Guvene Mêrdîn de qisey kerd û vat, îqtîdar şarê kurdî ra terseno. Guvene daye zanayene ke heta ke CHP nêbo wayîrê tewirêkê zelalî do mebo îqtîdar
Nobeta Demokrasîye ya verba derbeya qeyûmî roja 32ine de Mêrdîn de dewam kerde. Polîsan der û dorê bînaya HDPyî girewt. HDPyîjan çalakîya xo ver bînaya partîye de dewam kerde. Parlementera Partîya Demokratîke ya Şaran (HDP) û Hemsereka Kongreya Komela Demokratîke (KCD) Leyla Guvene zî nobete de amade bî.
Guvene bale ante serê derûdorgirewtişê polîsan ê ser çalakîyanê HDPyîjanê ke Mêrdîn û şaristanê bînan de yê û va: “Şima çita ra tersenî? HDP wexto ke qisey keno, Kurdî wexto ke qisey kenî şima çira tersenî? Şima çira der û dorê ma gênê? Şima se bikê zî ma do heqîqatî ca nêverdî. Ma reyna vanê ke na mesele pê polîtîkayanê ‘asayîş’î çare nêbeno. Kurdî do xoverdayîşê xo yê verba Dehako zalim rê dewam bikê. Ma nê Suleman Soylû ciwanan erşaweno koy. Bi qiseykerdişanê xo ciwanan aciz keno. ziwanêko cîyekarî xebetneno. Raştîya xo de kesê ke ciwanan erşewono koy Suleman Soylû yo.”
‘Heta ke melese çareser nêbo do dejê neweyî bibê‘
Guvene daye zanayene ke seba ke HDP va ‘Ma îtaat nêkenî’ wazenî HDPyî lînç bikê û ard vîrî ke rîyê qiseyê xoyê ke Amedî de vatbi bîya hedef û vat: “Heta ke meseleya kurdî pê rayîrê demokratîke çare nêbo dêjî do dewam bikê. Ma destûr naye nêdanê. Ma pîya verba nê vinderê. Heta nika Dinya de rewşê winasîyî ameyî dîyene û na mesele bi aqîlo hempar, bi rayîro demokratîk çareser bîyî. Wexto ke ma na qisa vanê, şima vanê ma tehdît kenî. No tehdît nîyo realîte yo. Êyê ke asinî ra tersenî nênuşenî trenî. Ma niştê nê trenî ro, ma game bi game ser rayîrê azadîye de şinê. Qewetêk nêşkeno nê trenî vindero. Ne îqtîdarê AKP-MHPyî ne zî îqtîdarê bînî. Tarîxî de êyê ke pê poltîkayanê asayîşî tê gêrayê vînî bî. La şarî cayê xo de cuya xo rê dewam kenê.”
Guvene vat heta ke CHP nêbo wayîrê tewirêkê zelalî do mebo îqtîdar. MÊRDÎN
