HRE’yê bi daxuyaniyekê ragihand ku hêzên wan li Efrîn û Mareyê li hêzên dagirker xistine û di encamê de 8 çete û leşkerên artêşa tirk hatine kuştin
Hêzên Rizgariya Efrînê (HRE) têkildarî çalakiyên hêzên wan ên di demên dawî de li dijî artêşa tirk û komên çete yên girêdayî wê pêk anîn, daxuyaniyeke nivîskî weşand. HRE’yê da zanîn ku hêzên wan li Efrîn û Mareyê li hêzên dagirker xistine.
Di daxuyaniyê de HRE’yê diyar kir ku hêzên wan di 19’ê îlonê de hem li Efrînê û hem jî li derdora wê çalakiyên cur bi cur pêk anîne û kitekitên çalakiyan wiha parve kirin: “Hêzên me di roja 19’ê îlonê de bi çalakiyeke sabotajê komeke çeteyên girêdayî artêşa tirk a dagirker ên li derdora gundê Meryemîn ê Şera ya Efrînê hede girt. Di çalakiyê de 5 çete hatin kuştin û hêzên me dest danîn ser çekeke AK-47 û hejmareke belge û nasnameyên çeteyan.”
Li navenda Efrînê çalakî
HRE’yê di berdewamiya daxuyaniyê de jî destnîşan kir ku hêzên wan di heman rojê de êrîşî çeperên çeteyên girêdayî artêşa tirk ên li derdora Mareyê kirin û daxuyanî wiha bi dawî kir: “Di çalakiyê de 3 çete hatin kuştin. Di heman rojê de hêzên me li hemberî çeteyên girêdayî dewleta tirk ên li derdora Dewara Newroz a li navenda Efrînê jî çalakiyeke sabotajê pêk anî. Encama çalakiyê nehat zanîn.” EFRÎN
