Rêxistina HDPyî ya Mêrdînî roja 36ine ya Nobeta Demokrasîye de çalakîya xo daye domnayene. Nobete de parlamentara HDPyî ya Mêrdînî Ebru Gunaye vat ke şar pê gonîya çareyê xo şaredarîyî tepîya girewtî û ê do şaredarîyan qeyûman ra nêverdî
Partîya Demokratîke ya Şaran (HDP) ya Mêrdînî, verba tayînkerdişê qeyûmî 36 rojî ra nata Nobeta Demokrasîye de ya.
Ewro ver Walîtîya Mêrdînî pêro çalakîyî ameyî qedexekerdene, verê despêkerdişê çalakîye bi seyan polîsan der û dorê bînaye girewtî. Seba ke polîsan der û dorê bînaya HDPyî girewt, îdarekar, endam û parlamenteranê HDPyî bînaya HDPyî de çalakîya xo rê dewam kerdî.
Nobete de parlamentera HDPyî ya Mêrdînî Ebru Gunaye qisey kerde û ard ziwan ke ê do şaredarîyanê xo qeyûman ra nêverdî. Gunaye wina va: “Pê destê qeyûmî îradeyê kurdan xesp kerde. Verba xespkerdişê îradeyê xo 36 rojî ma xo ver danê. Derheqê qeyûman de merdim eşkeno zaf çîyan vajo. La no zerrîya ma rehet nêkeno. Ma xespê qeyûman qebul nêkenî û îradeyê xo zî înan ra nêverdenê. Sîstemê ma Hemserekîye yo. No sîstem kewto destê qeyûman. Hemserekîye xeta ma ya mor a. Ma do verna nê xespî têkoşînê xo rê dewam bikê.”
Çalakîye pê sloganan qedîyaye. MÊRDÎN
