Bi taybetî zî nê çar serrê peyînan de mîyanê hewtyes serran ê desthilatîya AKP’î de şarê Kurdî heme reyan zêdehîrê bîyo şahid û mexdûrê her qayde tundî, îşkence, kiştiş, hepisbîyayîş û koçbîyayîşan. Hetê heman desthilatî ra bi awayêke sîstematîkî heqê şarê Kurdî yê merdimahî, Heqê tûtan û zêdetir zî heqê dayan ameyo binlingkerdişî. Têkoşîna azadî û demokrasî ya hemverê desthilatîya dagirkere de ey ê ke zêdetir zerrey înan veyşawa û mexdûr bîyê helbet ancî dayê bîyê û ancî ey ê ke hemverê heme qayde êrîş, şer û dişmintîya desthilatdaran rayîrê aştî de têkoşînêke bêhempa dayo dayê bîyê. Desthilatîya ke mafê ziwanê dayîke ra bigî heta mafê cuwiyînî dayê Kurdan bi heme awayî mafê înan ra bêpar verdayê vîst roc ra zêde yo dest eşto hestanê înan û bi awayêke trajîkî hestanê dayan zî îstismar kena.
Dayêy ke bi îdiaya HDP tûtê înan remnayê ko(!) verê avahîya HDP’î de niştê ro di îhtîmalan ey ew ca dayê rûniştişî. Yew yan desthilatî pereyêke zêde dayê înan û peywirêke newîn dayo milê înan ser, ê diyîne beno ke cahilî û nezanîya xo ra kewtê dimayê vatişanê na desthilatî. Merdim înan ê ke rûmet û hêvîyanê tûtanê xo, raman û îdealanê tûtanê xo zêdehîrê qîmet danê peran bido hetêke ey ê ke cahilî û nezanîya xo ra kayanê lîşinan ê desthilatî rê bîyê hacet ra nê pers bikero; şima çiqas vatişê ‘HDP’î tûtê ma remnayê’ ke desthilatî bi şima dano vatişî ra bawer kenê? Şima çiqas bawer kenê ke gerîlatî bi remnayîşîya tûtan bena? Û şima çiqas bawer kenê ke tûtê şima yê ke rayîrê azadî bi zerre xo weçînayo bi vengdayîşê HDP’î ageyrê keye?
Eke hayey şima tarîxe dagirbîyayîşê welatê şima û dimara têkoşîna tûtanê welatê şima yê hemverê dagirkeran ra bibayne şima go bivînayne ke ne wextê Serhildanê Şêx Ubeydullahî de, ne wextê yê Şêx Seîd û Seyîd Rizay de ne zî heta vîst û panc hîrsi serre verî partîyêka Kurdan a sîyasî ya sey HDP’î bî la tûtanê şima semedê azadîya şima ancî verê xo dayne nê rayîrî. Wexta ke dagirkeran tu çiyêke destê şarê Kurdî de nêverda bi zî tûtanê Kurdan verê xo dayne rayîrê azadî. Nê bizanê ke na desthilatî bi qaso ke neyarê HDP’î ya aye zehf zehf zêdehîrî neyarê tûtanê şima ya. Ancî bi qaso ke neyarê dayanê Aştî û dayanê Şemî (Cûmartesî) ya endeyke zî neyarê şima bi xo ya. Tenê wazena heta cayêke şima bixebetno.
Hay ro xo bibê û meverdê ke desthilatî şexsiyetê şima de kay bikero û verê şima bido cayo ke wazena. Desthilatî şima ew ca dayê rûniştişî û kiştişê tûtanê şima verê şima de kena meşrû. Mekerê xo vîr ra aye ke paskil da maseya çareserî/aştî ro na desthilatî bi xo bî û na desthilatî bi xo bî aye ke dimayê qelebnayîşê maseya çareserî bi hezaran tûtî, extîyarî û dayê Kurdan qirkerdiş ra derbas kerdî. Eke na desthilatî masa nêqelebnayne eyro roc bi hezaran tûtî, extiyar û dayê ke binê herî de yê go weş û saxî bayne. Bi rûniştişê şima yê verê HDP’î de ne tûtê şima geyrenê û ne zî na desthilatî peynî ro şerrê xo yê lîşinî ana. Bi rûniştişê şima yê ew ca yî tenê zerre tûtanê şima zêdetir dicena û şikêna û desthilatî şerrê xo yê lîşinî xorîtir kena û zerre dayan zêdetir veyşnena.
