Hindistan de 3 rojî yo ke varanêko zêde vareno û varano zêde cayê xo da laserî. Varayîşê varano zêde vera welat de laser werişt û netîceyê laserî de tewr tayî 120 kesî cuya xo vindî kerdî
Hindistan de sereyê aşma hezîrane ra nata 3 aşmî yo ke demserrrê musonî de varanêko zêde vareno û varano zêde cayê xo da laserî. 3 rojî yo ke no varayîş tesîrê xo zêdîna û laserêko gird virazîya. Netîceyê weriştişê laserî de ame vatene ke goreyê tehmînan tewr tay 120 kesî cuya xo vindî kerdî.
Goreyê xeberanê medyaya Hindistanî eyaletê Uttar Pradeşî de 79, eyaletê Bilharî de 25, Utarakand, Medya Pradeş û Racastanî de 13 û Guceratî de 3 kesî laserî de vindî bîyî û cuya xo vindî kerdî.
Eyaletê Ballia de zîndano ke 900 hepsî tede tepiştebî rîskê laserî vera ame vengkerdene. Laser de tewr zêde paytextê eyaletê Bilharî Patna zirar vîna. Keye, nêweşxane, dikan û heme awanîyî binê awe de mendî.
Selahîyetdarî dayî zanayene ke varanê musonî peymeyê varayîşê demserrî derbaz kerdo. Varayîşê musonî Asyaya Başûrî de sereyê aşmanê hezîrane de dest pêkeno û heta êlule dewam keno. Varayîşê musonî beno sebebê qeza û afetanê xozayî yê girdan. Varayîşê emserrî de Hindistan, Nepal û Bangladeşî de heta nika tewr tay 400 kesî cuya xo vindî kerdî.
