Ewro saetanê serê sibayî de taxa Îstasyonî ya qezaya Artuklu de polîsan eştbî keyeyêk ser û ameybî îdîakerdene ke keso bi nameyê Ferhat Şîmdîyî yê HPGyî seba ke nêkewo dest cuya xo peynî kerdo. Cenazeya Şîmdîyî binê ablûqaya polîsan de ameye definkerdene
Taxa Îstasyonî ya qezaya Artuklu ya Mêrdînî de polîsê sîvîlî û tîmê taybet saetanê serê sibayî de eştî keyeyêk ser. Sereştişê keyeyî de ame îdîakerdene ke keso bi nameyê Ferhat Şîmdîyî ke yeno îdîakerdene endamê HPGyî yo û 7ê êlule de qezaya Dêrikî de pêrodayîşêk de birîndar bîyo, seba ke nêkewo dest cuya xo peynî kerdo. Şaredarîya Girdî ya Mêrdînî ke qeyûm tayînê aye ameybî kerdene seba wedarnayîşê cenazeye wesayîtê cenaze nêdaye û keyeyê Şîmdîyî bi îmkananê xo cenaze morg ra girewt û berd taxa Îstasyonî.
Polîsî definkerdişê cenaze ra ver goristan girewtî binê ablûqa û teberî ra dekewtişê goristanî qedexe kerdî. Ame zanayene ke polîsî ferdanê keyeyî rê vatî ‘Wa kesêk tîya de siloganan nêerzo û zaf qelebalixî nêwirazîyo. Nênê ma do cenaze şima ra bigêrî.’
Cenaze badê wecîbeyanê dînî û wendişê duayan ameye definkerdene. MÊRDÎN
