Hûmara 175ina rojnameyê menganeyî yê cinîyan Newaya Jin bi manşetê ‘Teşrîna Verêne vengdayîşê xoverdayîşî ya’ vejîyaye
Hûmara Teşrîna Verêne ya rojnameyê cinîye yê Ewropa Newaya Jin ameye çapkerdene. Na hûmare de mucadeleyê cinîyan ê şorişgêran ê ke menga Teşrîna Verêne de cuya xo vînî kerde, yeno destgirewtene.
Endama Meclîsê Koordînasyonê Partîya Azadîya Cinîyanê Kurdistanî (PAJK) Hêlîn Umîte nuşteyê xo yê seba rojnameyî de pare kerd ke têkoşînê azadîye yê cinîyan ê Kurdan 40 serrî yo ruh, hişmendîye, hîs û cuye dano dînamîkanê averşîyayîşan ê netewa demokratîke û azadîya cinîye. Çarçeweya babete de nuşteyê derheqê Arîn Mîrkane û Mîhrîban Sarane rojname de ameyî weşanayene.
Hûmara Teşrîna Verêne ya rojnameyî de roportajê bi endama Koordînasyonê TEV-Demî Foza Yûsife reyde derheqê rewşa herême ame weşanayene. Yûsife behsa ‘Herêma Biasayîşe’, ‘polîtîkayê Dewleta Tirkî’ û sn kerde.
Zîndanê Gebze ra Sema Mazlûme derheqê Komploya 15ê Sibate ya Mîyanneteweyî de nuşteyêk nuşte.
Rojnamegere Gulîstan Çîya heman babete şîrove kerde û verba çerxanê komplo bale ante serê hewcedarî ya bi kampanpa û plotforman ê mîyannetewî yê sey ‘Ocalanî rê Azadîye’.
Rojnamegere Ronî Eylem zî bi dosyayêka hera ya cigêrayîşî ‘Şêrê Dewr o Newe’ û taxrîbatê ey ê serê cuya merdiman ê rojane nuşteyêk nuşt.
Babeta qeyûman û destsernayîşê şaredarîyan ê Partîya Demokratîke ya Şaran (HDP) zî hetê aktîvîsta cine ya Sara Aktaşe ra ameye munaqeşekerdene.
Wekîla Partîya Demokratîke ya Şaran (HDP) Feleknas Ûca zî heman babete de nuşteyêk nuşt û pare kerd ke xoverdayîşê cinîyan ê verba faşîzmî heqêko tabîî yo.
Portre û nuşteyan reyde zî zafê xeber û dosyayê derheqê weşîye, zanistî û yarîyî estî. Coka rojnameyê Newaya Jinî na menge zî wayîrê muhtewaya xurt o.
