HDPyî seba ziwanê kurdkî aver şore û astengê verê ziwanê kurdkî de wedare kampanyayêk da destpêkerdene
Gama verên ya kampanya zî na ya ke Nobetê Demokrasîye yê ke verba tayînkerdişê qeyûman yenê viraştene do bibê kursîyê ziwanê dayîke. Komîsyonê Ziwanî yê Kongreya Komela Demokratîke (KCD), Partîya Herêmê Demokratîkî (DBP) û Platformê Ziwanê Kurdkî do paşt bidê kampanya. HDPyo ke kampanya kirişeno çalakîyanê nobete, çalakîyan de do bi hewayêkê sembolîkî dersanê Kurdkî bido.
Qiseykerdoxê Platformê Ziwanê Kurdkî Şerefxan Cizirî behsa kampanya ya Partîya Demokratîke ya Şaran (HDP) kerd û bale ant ke Nobeta Demokrasîye de destpêkerdişê kampanyayêk zaf girîng o û ganî Ziwanê Kurdkî her hetê cuye de bêro xebitnayene. Cizirî va: “Kurdkî ganî sey ziwanê propaganda nêro xebitnayene û seba ke aver şêro ganî her wareyî de xebatî bêrê kerdene. Ganî ma ziwanê kurdkî her ca de bidê naskerdene. Na nêna a mena ke ma verba ziwananê bînan ê. Pêro ziwanî wa bêrê qiseykerdene, la ma kurd ê û ma ganî heqê xo yê qiseykerdişê kurdkî bişuxulnê.” AMED
