Dewa qezaya Licê ya Amedî de wextê mehsereyan dewam ken û du kewt lênan. Hemwelatijî dîyar kerdî ke rezê nika zî sey rezanê verênan nîyî
Dewa Huseynîkî ya qezaya Licê ya Amedî û dewanê dormeyan de wextê mehsereyan dewam keno. Hemwelatijî saet 05.00î yê serê sibayî de erê xo danî mîyanê rezan. Bi karrd û meqesanê xo engure çinenî û benî mehsere. Badê ke hemwelatijî enguran kenî xêşeyanê girdan bi payan ay danî ser û awa engure vejenî. Dima ra şîreyê engure sefênenî û lênanê girdan de girnenî.
Gama ke şîreyê engure lênan de girîyeno kefê serê şîre yeno girewtene. Bi no hawa hema hema 8 saetan adir ser de yeno girnayene û dima ra beno dims. Gama ke dims serdin beno, lênan ra yeno vengkerdene. Hemwelatijê ke bastêq virazenî zî sere de şîre girnenî, dima ra ard kenî mîyanê şîre û girnenî. Wexto ke esîd virazîyen çarşefan ser de yeno rafînayene û demêk verê tîje de yeno huşkkerdene. Wexto ke bastêq huşk beno pê awe çarşef yeno hî kerdene û bastêq û çarşef yewbînan ra yeno cîyakerdene.
Hemwelatijê ke şîyî rezan ser dîyar kerdî ke mehsul emserrî zaf xirab o. Sebebê ci nîno zanayene, labelê hema hema no 3 serrî yo ke bax koke ra huşk benî. Hemwelatijî dayî zanayene ke verê cû nê rezan ra 10-15 lênan şîre girewtêne, labelê çend serrî yo ke tena lênêk vejîyeno. AMED
