Girtiyê nexweş Zerdeşt Odûncû ku li Girtîgeha Tîpa F a Edîrneyê tê girtin ragihandin ku ji ber wî tedawiya di weziyeta kelemçekirî qebûl nekiriye kezeba wî xera bûye
Li Girtîgeha Tîpa F a Edîrneyê rewşa girtiyê nexweş Zerdeşt Odûncû her diçe xirab dibe. Odûncû, bi rêya telefonê li malbata xwe geriya û ragihand ku kezeba wî xera bûye. Her wiha Odûncû ragihand ku gava ji bo tedawiyê wî birine nexweşxaneyê, tedawiya di weziyeta kelemçekirî de lê hatiye ferzkirin lê belê ji ber vê pêkanînê tedawî red kiriye.
Odûncû, li dijî tecrîdkirina Rêberê Gelê Kurd Abdullah Ocalan, 162 roja di greva birçîbûnê de mabû û ji ber vê 120 roj cezayê hucreyê lê hatiye birîn. Dayik Selma Odûncû ku bi rêya telefonê bi kurê xwe re axivî, diyar kir ku moralê kurê wê baş bûye lê belê tenduristiya wî qet nebaş e. Dayik Odûncû destnîşan kir ku kurê wê jê re gotiye dema wî birine nexweşxaneyê tahde lê kirine. Dayik Odûncû da zanîn ku bijîşkan gotiye wê nexweşîna wî heta mirinê bidome û wiha got: “Bijîşkan gotiye, gerek xwarina bêxwê bixwe. Wî jî got, gava kîlo digire bedena wî nikare hilgire.”
Dayik Odûncû destnîşan kir ku divê kurê wê rojek berî rojekê bê tedawîkirin û wiha got: “Nexweş e lê belê bi tena serê xwe di hucreyekê de ye. Ji ber bi tena serê xwe ye û nayê tedawîkirin her diçe rewşa wî xirabtir dibe. Dixwazim wekîlên me çareyekê bibînin. Em dixwazin her kes dengê me bibihîse.” MÊRDÎN
