Navenda PEN’a Kurd têkildarî êrîşên Tirkiyeyê yên li dijî Rojava nerazîbûn nîşan da û banga xwedî derketina destkeftiyên li Rojava kir û xwest ku mirovahî rê nede komkujiya li ser Rojava
Rêveberiya Navenda Giştî ya PEN’a Kurd têkildarî êrîşên Tirkiyeyê yên li dijî Rojava ku di roja duyemîn de didome daxuyaniyek nivîskî weşand.
Navenda PEN’a Kurd bertek nîşanî êrîşên dagirkeriyê yên li dijî Rojava da û wiha got: “Di domana sedsalên borî da Rojhilata Navîn her tim bûye qada şerên mezin û malwêranker. Hêzên dagirker û talanker ji bo sepandina serdestî û dagirkerîya xwe, xwîna bi milyonan mirov ji olên cuda rijandine. Di van şeran da her tim mirov bindest û bêguneh bûne qurbanî. Gelê kurd wekî qewmekî xwecihî û resen ê Rojhilata Navîn her tim bûye mexdûrî û qurbanîya şerên dagirker û talankeran. Welatê wan ji aliyê desthilatdarên herêmî û cîhanî ve hatiye parçekirin. Ne tenê nasnameya mirovî, zimanî û çanda wan jî nehatiye pejirandin. Kurd pirî caran bi awayekî fîzîkî, siyasî û civakî tûşî komkujiyan bûne. Tevî hemû zordestiyan gelê kurd dest ji xebatê bernedaye û di encama vê xebat û têkoşînê da li Başûr û Rojava, deskeftiyên mezin bi dest xistine.”
Armanc qirkirina gelê kurd e
PEN’a Kur destnîşan kir ku armanca dewleta tirk qirkirina gelê kurd de û ev tişt anî ziman: “Desthilatdarên şovînîst ên herêmê li ser asta cîhanî û herêmê bi awayekî domdar hewla bêstatuhiştin û reşkirin a kurdan dane. Îro jî dîsa gelê kurd li Rojavayê Kurdistanê bi qirkirinekê ra rû bi rû ye. Rewşa niha jî hewldanek navneteweyî ye ku derencama wê jî komkujî û malwêraniyeke gelek mezin diafirîne. Ya ku li Efrînê qewimî jî mînakek berbiçav e û heta vê kêliyê jî qirkirin, guhartina pêkhateyan û demografiya vî bajarî berdewam e. Bi heman awayî dewleta tirk êrişî Rojavayê Kurdistanê dike. Armanc qirkirina gelê kurd û guhartina demografiya Rojavayê Kurdistanê ye. Bi vê ra jî dixwaze azmûna pêkvejiyana aştiyane ya gelên cuda li Rojavayê Kurdistanê bi dawî bike.”
Pêşî li êrîşên Rojava bigirin
PEN’a Kurd di dawiya daxuyaniya xwe de jî ev tişt got: “Em weke Navenda PEN a Kurd bang li hemû mirovên xwedî wijdan û azadîxwaz dikin ku demildest hewl bidin da ku pêşî li êrîşên li ser azmûna azadî û serkeftina Rojavayê Kurdistanê, pergala pêkvejiyana gelên cuda ya li Bakur û Rojhilatê Sûriyeyê, bigirin. Em bang li hemû mirovên xwedî helwest dikin piştevaniya me bikin da ku bi hev ra em li dijî hemû plangêriyên qirêj bigirin û rê nedin komkujiya li ser Rojavayê Kurdistanê.” AMED
