Çavkaniyên ji herêmê da zanîn ku hêzên rejîmên Îran û Sûrîyeyê li Dêrazorê amadekariyên êrîşeke gengaz a li dijî herêmên di bin kontrola HSD’ê de dikin
Piştî ku artêşa tirk a dagirker û komên wê yên çete li dijî rojavayê Kurdistanê dest bi êrîşa dagirkeriyê kir, çeteyên DAIŞ’ê û rejîmên Îran û Sûriyeyê jî ketin nava liv û tevgerê. Li gorî agahiyên ji herêmê, bi destpêkirina êrîşa li dijî rojavayê Kurdistanê re hêzên rejîmên Îran û Sûriyeyê jî dest bi amadekariya êrîşên li dijî Dêrazorê kirin.
Çavkaniyên ji herêmê ragihandin ku fermandarekê ji îstixbarata Parastina Hewayî ya rejîmê duh bi rêveberên Îran û Sûriyeyê re civiyane. Civîn li Hec Elî El Cifrî ya Dêrazorê pêk hat û di civînê de 70 leşkerên rejîm û Îranê amade bûn.
Di berdewamê de jî çavkaniyan daxuyand ku hêzên perexwer ên girêdayî rejîmê li Dîfa El Wetanî ya Dêrazorê amadekariya êrîşê dike. Çavkaniyê got ku dîroka êrîşê nediyare. DÊRAZOR
