Ji partî û rêxistinên cuda yên Başûr gelek ciwan hatin bahev û Eniya Lawan a Ji Bo Parastina Kurdistanê ava kirin. Ciwanan wan da zanîn ku divê di zûtirin dem de yekitiya gelê kurd bê avakirin û ciwan vexwendin refên têkoşînê
Ciwanên ji nava hizb û aliyên siyasî yên cuda yên başûrê Kurdistanê, ji bo parastina rojavayê Kurdistanê li Silêmaniyeyê ‘Eniya Lawan a Ji Bo Parastina Kurdistanê’ ragihand. Ciwanan daxuyanî li Xwaringeha Diyarbekir a li Silêmaniyeyê da.
Eniya Lawan a Ji Bo Parastina Kurdistanê ji ciwanên ‘Tevgera Goran, Yekitiya Niştimanî Kurdistanê (YNK), Yekgirtû, Hizba Şuî, Jinên Ciwan ên Têkoşer û Ciwanên Welatparêz ên Kurdistanê’ pêk tê. Di daxuyaniyê de ciwanan anî ziman ku divê di zûtirin dem de yekitiya kurdan bê avakirin û li dijî dagirkeriyê têkoşîn bê dayîn.
Li gorî daxuyaniyê, armancên Eniya Lawan a Ji Bo Parastina Kurdistanê wiha ne:
*Ji bo parastina Kurdistanê avakirina yekitiya neteweyî ya gelê kurd.
*Têkoşîna li hemberî parçebûn û dabeşkirina navbera neteweyên cuda.
*Komkirina alîkariyê ya ji bo pêwistiyên leşkerî, mirovî û tendirustî yên ji bo rojavayê Kurdistanê.”
Herî dawî jî ciwanan wiha bang kir: “Em hemû berpirsyarên xak û neteweya xwe ne. Em bang li ciwanan dikin da ku ji bo Rojava seferber bibin û cihê xwe di nava têkoşînê de bigrin.” SILÊMANIYE
