Fermandariya Giştî ya HSD’ê der barê komkujiya ku dewleta tirk li Serêkaniyê pêk anî daxuyaniyek da û wiha got: “Dewleta tirk li ber çavê cîhanê dixwaze qirkirina etnîkî bike.”
Fermandariya Giştî ya Hêzên Sûriyeya Demokratîk (HSD) der barê komkujiya ku dewleta tirk a dagirker li Serêkaniyê li hemberî sivîlan kir, daxuyaniyek da.
Daxuyaniya Fermandariya Giştî ya HSD’ê wiha ye:
“Dewleta tirk tevî çeteyên girêdayî xwe li pêş çavên cîhanê gelên Bakur û Rojhilatê Sûriyeyê qir dike. Artêşa tirk a dagirker îro (13’ê cotmeha 2019’an) li Serêkaniyê li konvoya sivîlan daye. Di vê konvoyê de gelek sivîl şehîd û birîndar bûn.
Di konvoyê de gelê sivîl, rojnameger û Hêzên Ewlekariya Giştî hebûn ên ku sivîl diparastin. Dewleta tirk sivîl û rojnameger hedef girtin. Ev jî rastiya Tirkiyeyê diyar dike.
Ev êrîşên dewleta tirk ên li pêş çavên cîhanê sûcekî mezin e. Dewleta tirk hemû nirxên mirovayetiyê bin pê dike. Raya giştî ya navneteweyî berpirsê vê qetlîama Tirkiyeyê ne. Em bang li hêzên cîhanê dikin ku li hemberî qetlîama sivîlan bila têkevin nav hewldanan.”
