Komeke din a ciwanên ji başûrê Kurdistanê ji bo ku tev li refên berxwedanê yên rojavayê Kurdistanê bibin, derbasî Rojava bûn. Ciwanan daxuyaniyek da û diyar kirin ku heta dagirker li ser axa Kurdistanê hebin, dê berxwedana ciwanên kurd jî her û her hebe
Ciwanên Welatparêz ên Kurdistanê û Jinên Ciwan ên Têkoşer ji bo çeperên berxwedanê werin xurtkirin û êrîşên qirker ên dewleta tirk ên li ser rojavayê Kurdistanê bên têkbirin, seferberî ragihandibûn. Piştî ragihandina seferberiyê ciwanên ji başûrê Kurdistanê bersiva banga seferberiyê dan û berê xwe dan rojavayê Kurdistanê.
Koma yekemîn a ciwanên Başûr duh gihiştin rojavayê Kurdistanê. Koma duyemîn jî îro ber bi rojavayê Kurdistanê ve bi rê ket. Di nava koma duyemîn de ciwanên ji Silêmaniye, Çemçemal, Xaneqîn, Kerkûk û Raperînê hene. Ciwan beriya ku derbasî Rojava bibin, daxuyaniyek dan.
Daxuyaniya ciwanan
Li ser navê ciwanên di koma duyemîn de Dêrsim Germiyanî ku xelkê Çemçemalê ye axivî û ev tişt anî ziman: “Çend roj berê rêxistina Ciwanên Welatparêz banga seferberiyê kiribû. Me jî weke ciwanên Başûr bersiva banga seferberiyê da û beşdarî berxwedana rojavayê Kurdistanê dibin. Em ê li dijî dewleta tirk a faşîst bisekinin. Em ji dijmin û dagirkerên kurd re dibêjin ku heya dagirkerî li ser xaka me berdewam be, dê ciwanên kurd jî li dijî hemû dagirkeran bisekinin.” SILÊMANIYE
