Şervanê ke Serêkanîyê de verba îşxalkarîya tirkî xoverdaîşêko bêhempa danê, vanê ke no şerê mendiş û nêmendişî yo û veng kerd ke Kurdî pêro wurzê payan ser û xo ver bidê
Derheqê propagandaya dewleta tirkî ya îşxalkare ke vatêne ‘Merkezê şaristanî yê Serêkanîye ame destkewtene’ rojnamegerê ma Ersîn Çaksû fermandaranê xoverdayîşî reyde qisey kerd.
Çîyêk nêeşkeno moralê ma xerap bikero
Şervana Yewîya Cinîyanê Şengalî (YJŞ) Nûdeme ya cepheyê Til Xelefî ra wina va: “Panc rojan ra nata ma tîya de yê. Hêrişê ke ma rê yenê kerdene, qet ma nêşiknayî. Çunke ma wayîrê îradeyo qayîm ê. Serêkanîyê destê ma de ya, xoverdayîşê embazanê ma dewam keno. Çîyêk nêeşkeno moralê ma xerap bikero. Ma bi fikr û felsefeya Rayberîya xo, xo xurt kenê. Îradeyê ma xurt o, neya re no teknîk pê ma nêeşkeno. Moralê ma, moralê embazanê ma baş o û şer bi moralî dewam keno.”
Moralê ma zaf baş o
Fermandaran ra Sîdar Qamişloyî va: “Vizêr hêrişêko giran estbi. Saete 10.00î de dest pêkerd û ma kewtê mabênê çembere. Teyarayanê şerî zî serê ma de bombayî varnayêne. 7-8 embazê ma birîndar bîyî. Ma têna 4 embazî sax mendî. Sibayî ra heta 02.00 ma mabênê çembere de mendî. Seba ke ma embazanê xo yê birîndaran bixelisnê û asayîşê înan bîyarê ca, ma xo çembere ra vet. Dima zî ma reyna operasyon da destpêkerdene û cayê ke ameyî îşxalkerdene kontrol kerdî. Serêkanîyê binê kontrolê ma de ya. Moralê ma zaf baş o. Çunke serkewtiş ê ma yo. Ma serkewtiş da verê xo, ma binkewtiş qebûl nêkenê. Şervanê ma yê Hêzê Sûrîyeya Demokratîke (HSD) bi çoşîyêka pîle tewrê operasyonê Serêkanîyê benê. Ganî ma Kurdî wurzê payan ser û hêrişanê dewleta tirkî ya faşîste û hêrişanê Erdoganî vindernê. Kesêko ke xo rê vano ez kurd a, ganî wurze payan ser. No şer seba Kurdan şerê mendişî û nêmendişî yo.” SERÊKANÎYÊ
