Li bajarê Kerkûkê bi armanca komkirina alîkariyan a ji bo Rojava kampanyayek bi navê ‘Ji Kerkûkê ber bi Rojava ve’ hate ragihandin
Bi tevlêbûna 15 rêxistin, kom, navend, komên hunerî, rewşenbîr, mamosteyên ayînî û çalavanên sivîl bi dirûşma ‘Kerkûk ji bo Rojava li ser pêyan e’ kampanyaya ‘Ji Kerkûkê ber bi Rojava ve’ hate ragihandin.
Endamê Encûmena Kampanyayê û çalakanê sivîl Nejad Necim di daxuyaniya çapemenî de armanca kampanyayê vegot.
Necim diyar kir ku kampanyaya ku wan daye destpêkirin bajarê Kerkûkê û hemû navçeyên wê digire nava xwe û da zanîn ku dê kampanya 10 rojan bidome û wiha got: “Alîkariyên ku têne komkirin derman û pere ye û dê ji bo mexdûrên Rojava; em ê bi alîkariya Heyva Sora Kurdistanê alîkariya ji kampanyayê bê berhevkirin bişînin rojavayê Kurdistanê.”
Di daxuyaniyê de Necim bal kişand ser rewşa koçberkirinê û wiha pêde çû: “Em xelkê Kerkûkê jî ji ber şer û nakokiyan koçber bûne, ji bo wê koçberbûnê baş dizanin. Ji ber vê bi taybetî Kerkûk êşa Rojava dizane û biqasî 10 rojan xebatên komkirina alîkariyê pêk tînin û bi rêya Heyva Sora Kurdistanê bişînin Rojava.”
Her wiha Mamoste Welî jî diyar kir ku dewleta tirk a dagirker li ser navê îslamê êrîşî Rojava dike û ev tişt anî ziman: “Êrîş û dagirkeriya Erdogan dike, li derveyî îslamê ye. Ji ber ku Erdogan nîjadperestî û aloziyan derdixe. Lewre kiryarên Erdogan dûrî îslamê ne. Kuştina zarok, jin û mirovên sivîl di tu olan de nayê qebûlkirin. Xeyalê dijmin ê dagirkirina Kurdistanê pûç û vala ye. Heta kurdek bimîne wê dagirker nikare Kerkûk, Efrîn, Kobanê û Qamişloyê dagir bike.”
Her wiha bi heman armancî hunermendên Silêmanî û Radyoya Xak jî bi hevbeş kampanyek alîkariyê ji bo Rojava ragihandin. Alîkarî li Kargeha Cixaran tên berhevkirin û kampanyê dê heya demek nediyar berdewam bike. KERKÛK / SILÊMANÎ
