Şervanên HSD’ê êrîşên li dijî xeta Eyn Îsa û Çelebiyê şikandin û panzêreke çeteyan rûxand. Di heman demê de şervanan gundên Aliya û Erbeîn ên Til Temirê jî ji çeteyan rizgar kirin
Êrîşên hêzên artêşa tirk a dagirker û komên çete yên girêdayî wê yên li dijî rojavayê Kurdistanê bi hemû dijwariya xwe didomin. Li hemberî vê êrîşa dagirkeriyê şervanên Hêzên Sûriyeya Demokratîk (HSD) jî di çarçoveya Berxwedana Rûmetê de bersivên tund didin.
Komên çete û artêş tirk îro ber bi danê êvarê ve bi dijwarî êrîşî xeta Eyn Îsa û navçeya Çelebî ya Kobanê kirin. Hat zanîn ku şervanên HSD’ê êrîşa çeteyan şikandin. Her wiha hat ragihandin ku di encama pevçûnan de şervanan panzêreke çeteyan bi temamî rûxand û yek jî derb kir. Hat zanîn ku şerê li derdora gundên Çelebî didome. Çavkaniyên leşkerî ragihand ku gelek kuştî û birîndarên çeteyan hene.
Balkêş e ku li herêma Çelebî navenda Koalîsyona Navneteweyî li gundê Xerab Işk heye lê tevî ku çeteyan sivîl revandin jî dengê xwe nekirin.
Li hêla din şervanên HSD’ê gundên Aliya û Erbeîn ên girêdayî Til Temirê bi temamî ji destê hêzên dagirker rizgar kirin. KOBANÊ
