Rêxistinên civaka sivîl ên li Hesekê bi daxuyaniyeke hevpar diyar kirin ku dewleta tirk li bakur û rojhilatê Sûriyeyê sûcên şer dike. Rêxistinan bang li hemû rêxistinên civakî yên navneteweyî kirin ku alîkariyê bidin û li dijî êrîşan derkevin
Buroyên rêxistin, komele û saziyên civaka sivîl ên li kantona Hesekê, têkildarî êrîş û binpêkirinên dewleta tirk ên li ser rojavayê Kurdistanê daxuyaniyeke nivîskî dan.
Di daxuyaniyê de hate gotin ku dewleta tirk û çeteyên wê bi awayeke vekirî li bakur û rojhilatê Sûriyeyê binpêkirinan dikin û daxuyanî wiha dom kir: “Dewleta tirk û komên girêdayî wê hemû bajar û gundên ewle yên li ser xeta sînor hedef girtin. Hemû qanûnên navdewletî û pîvanên mafên mirovan binpê kirin, sûcên ku pêk tînin sûcên li dijî mirovahiyê ne û di asta sûcên şer de ne. Bi van êrîşan dixwazin demografyaya herêmê biguherînin.”
Bi berdewamî jî hat gotin ku dewleta tirk tevî binpêkirinên kuştin, birîndarkirin û koçberkirinê, di heman demê de stasyonên ava, nexweşxaneyan û komên tenduristiyê jî hedef digirin û ev tişt hatin parvekirin: “Ji ber êrîşên dagirker, pêlên mezin ên koçberiyê çêbûn. Heta niha 300 hezar kes koçber bûn ku piraniya wan jin, zarok û kesên temen mezinin. Hêza Rêveberiya Xweser têrê nake ku ewqas mirovan binihêre û divê hemû komele, rêxistin û saziyên civaka sivîl ên mirovî demildest alîkariyê bidin û li dijî êrîşên dewleta tirk bisekinin.” HESEKÊ
