Di navbera şervanên HSD’ê û hêzên dagirker de şerekî giran diqewime. Hat zanîn ku çeteyan xwest ji sê hêlan ve bikevin Serêkaniyê lê rastî bersivên tund ên şervanan hatin û derbên giran xwarin. Di heman demê de hêzên dagirker gundên Kobanê jî bi dijwarî topbaran dikin
Berxwedana Rûmetê ya şervanên Hêzên Sûriyeya Demokratîk (HSD) a li dijî hêzên dagirker ên dewleta tirk û çeteyên wê ya li rojavayê Kurdistanê berdewam e. Di çarçoveya berxwedanê de şervanên HSD’ê derbên giran li hêzên dagirker didin.
Li gorî agahiyên ji Serêkaniyê, hêzên dagirker xwestin ji aliyê pêşesazî, Hawrne û deriyê sînor bikevin Serêkaniyê. Hat zanîn ku li ser vê yekê şervanên HSD’ê bersivên tund dan dagirkeran û derbên giran lê xistin. Çavkaniyan diyar kir ku gelek kuştî û birîndarên çeteyan hene û şer bi hemû dijwariya xwe didome. Her wiha dewleta tirk a dagirker navenda Serêkaniyê bombebaran dike.
Gundên Kobanê tên bombebarankirin
Çavkaniyên ji herêmê ragihandin ku hêzên artêşa tirk a dagirker û çeteyên wê di van kêliyan de gundên Siftek, Boban, Xurxurê, Kor Elî, Zormixar û bajarokê Şiyûx ê Kobanê topbaran dike. Hat zanîn ku şervan jî bersivê didin van êrîşan.
