Endamê Desteya Rêveber a TEV-DEM’ê Aldar Xelîl peyamek parve kir û wiha got: “Li Serêkaniyê gelek sivîl di bin metirsiya komkujiyê de ne. Em bang li aliyên pêwendîdar dikin ku demildest bikevin nava hewldanan da ku pêşî li komkujiyê bigirin.”
Endamê Desteya Rêveber ê Tevgera Civaka Demokratîk (TEV-DEM) Aldar Xelîl têkildarî êrîşên hêzên dagirker ên dewleta tirk û komên çete yên girêdayî wê yên li ser Serêkaniyê daxuyaniyek da. Xelîl da zanîn ku Serêkaniyê niha di dorpêçê de ye û xetereya komkujiyeke mezin heye.
Aldar Xelîl diyar kir ku artêşa tirk a dagirker û çeteyên wê nikarin li Serêkaniyê pêşve biçin û wiha domand: “Serêkaniyê niha dorpêç kirine û tevî ku gelek sivîl tê de hene, bênavber topbaran û bombebaran dikin. Sivîl niha bê av, bê xwarin û bê ceryan in. Di heman demê de nexweşxane ji hêla dewleta tirk û çeteyên wê ve tê topbaran û bombebarankirin. Divê hemû aliyên pêwendîdar têkevin nava hewldanan da ku pêşî li qirkirina sivîlan bigirin.”
Xelîl herî dawî jî wiha got: “Tevî ku Meclisa Ewlehekariyê Neteweyên Yekbûyî (NY) der barê êrîşên dagirkeriyê yên dewleta tirk de civînek li dar xist jî nekarî biryarekê bide da ku pêşî li vê qirkirinê bigire.” HESEKÊ
