Hêzên artêşa tirk a dagirker careke din êrîşî nexweşaneya Serêkaniyê kir. Di heman demê de gundê Eqîbe yê Efrînê jî topbaran kir û li gundekê Cindirêsê jî ciwanek revand
Êrîşên qirkirinê yên dewleta tirk û çeteyên wê yên dagirker ên li dijî rojavayê Kurdistanê berdewam in. Hêzên dagirker di serî de navenda Serêkaniyê, bi çekên giran û balafirên şer bênavber qadên sivîlan topbaran û bombebaran dikin.
Ev sê roj in artêşa tirk a dagirker û çeteyên wê bi çekên giran û balafirên şer êrîşî Serêkaniyê dikin. Şervanên HSD’ê jî li hemberî van êrîşên qirkirinê berxwedaneke mezin raber dikin. Li gorî agahiyên ji Serêkaniyê, hêzên dagirker di van kêliyan de careke din êrîşî nexweşxaneya Serêkaniyê û navenda bajar dikin. Hêjayî gotinê ye ku di nexweşxaneya Serêkaniyê de gelek sivîlên birîndar hene.
Eqîbe tê topbaran kirin
Di heman demê hêzên artêşa tirk a dagirker di van kêliyan de gundê Eqîbe yê Şêrawa ya Efrînê topbaran dikin. Topbarana li ser gundê Efrînê bi hemû dijwariya xwe didome. Têkildarî encamên topbaranê agahiyên zelal nehatin bidestxistin.
Ciwanek hate revandin
Çavkaniyên ji herêmê da zanîn ku hêzên artêşa tirk a dagirker di 12’ê cotmehê de ciwanê bi navê Mistefa Xêro Mamo yê ji gundê Aşkan Xerbî yê navçeya Cindirês a Efrînê, revand. Çavkaniyan got ku çarenûsa Mamo nayê zanîn.
