Fermandarê Giştî yê HSD’ê Mazlum Ebdî da zanîn ku agirbest ji bo deverên dikevin di navbera Girê Spî û Serêkaniyê de yên ku şer lê rû didin derbasdar e
Fermandarê Giştî yê Hêzên Sûriyeya Demokratîk (HSD) Mazlum Edî bi rêya telefonê tev li televîzyona Ronahiyê bû û têkildarî agirbesta di navbera DYA û dewleta tirk nirxand.
Mazlum Ebdî wiha got:
“Ev destpêkeke. Dagirkeriya TC’ê bi vê naraweste. Divê gelê me û hêzên siyasî têkoşînê xurt bikin, hêzên siyasî yên kurd yekitiya xwe çêbikin û bi hêz bikin. Ev sê roj in me li ser mijarê hevdîtin dikirin. Ji bûyerê em agahdar in û serokê DYA’yê bi xwe bi mijarê re eleqedar e. Ji bo vê jî ji Erdogan re name şand.
Divê gelê me bizane ku ev agirbest ji bo qada di navbera Girê Spî û Serêkaniyê de derbasdar e. Weke tê zanîn li vê derê bi sedan xelkê sivîl hate qetilkirin û bi hezaran jî ji cihê xwe koçber bûn. Me jî ev agirbest qebûl kir. Ji bo ku ev agirbest bigihêje encamê, em weke HSD’ê tiştên ku bikeve ser milê me em ê pêk bînin. Amerîka ji pêkanîna agirbestê berpirsayar e. Divê gelê me vegere cihê xwe. Divê armanca dagirkeran bi cih neyê. Ji bo qadên din tu hevdîtin çênebûne. Ji xwe hêzên me hê jî di cihê xwe de ne.
Ev agirbesta ku pêk hatiye encama berxwedana şervanên HSD’ê ye. Ev agirbest encama berxwedana şervanên HSD’ê ku ji ciwanên kurd, ereb û suryanan pêk tê ye. Dîsa ev encama berxwedana gelê kurd, gelên cîhanê ku piştevaniya gelê me kirine û encama dewletên cîhanî ku destek danê me ye. Ji bo wê jî hemû kesên ku piştevaniya me kirin em ji wan re spas dikin, slav û rêzên xwe pêşkêş dikin.
Metirsiya dagirkeriya dewleta tirk a li ser herêmê hê jî bi dawî nebûye. Ev despêkeke. Dewleta dagirker dê wiha nesekine. Divê gelê me tekoşîna xwe bilind bike. Divê partî û aliyên siyasi yên gelê kurd yekitiya xwe teqez çêbikin.”
