Li gelek navend û navçeyên başûrê Kurdistanê bi armanca piştgiriya bi rojavayê Kurdistanê re alîkarî tê berhevkirin. Di vê çarçoveyê de li Şengal, Kifrî, Qaladiz û Bawenûrê alîkarî hate komkirin û ji Rojava tê şandin
Bi armanca piştgiriya bi gelê rojavayê Kurdistanê ku ji 9’ê cotmehê ve di bin êrîşa qirkirinê ya dewleta tirk û komên çete yên girêdayî wê de ye, gelê başûrê Kurdistanê jî seferber bûye. Weke ku tê zanîn di encama êrîşên dagirkeriyê de bi sedhezaran gelên ji Rojava koçber bûn, bi sedan jê hatin qetilkirin û birîndarkirin. Gelê başûrê Kurdistanê hema hema li hemû bajar û navçeyan alîkariyê berhev dike û ji gelê rojavayê Kurdistanê re dişîne. Di vê çarçoveyê de li Şengal, Kifrî, Qeladizê û Bawenûrê alîkarî hate komkirin û dê ji Rojava re bê şandin.
ŞENGAL
Ji bo piştgiriya bi gelên Rojava re, şêniyên bajaroka Xanesor a Şengalê alîkarî kom kir û ji bo ku bişînin rojavayê Kurdistanê, radestî Meclisa Gel hate kirin. Hevserokê Meclisa Gel a Xanesorê Haşim Şengalî got ku wan li ser daxwaza gel ev pêngav daye destpêkirin û dê alîkariyên hatine komkirin ji Rojava re bişînin. Di heman demê de li bajarokên Sinûn, Borik û gelek gundan jî alîkarî tê komkirin.
KIFRÎ
Bi heman boneyê li navçeya Kifrî ya bi ser Germiyanê ve jî kampanyaya alîkariyê hate destpêkirin. Hat ragihandin ku kampanya dê sê rojan dom bike û tenê dê pere bên komkirin. Çalakvanên medenî ji bo komkirina alîkariyê çend lijne avakirine. Dê lijneyên hatine avakirin serdana xwediyên kargeh, konpanya, kesayetî, bazar û cihên giştî bikin. Her wiha li gundê Şêx Lenger ê Gewre yê Kifriyê jî alîkarî hatiye destpêkirin.
QALADIZ
Ji bo piştgiriya bi gelê rojavayê Kurdistanê re, li navçeya Qaladizê ya Silêmaniyê jî ev sê rojin kampanyaya alîkariyê hatiye destpêkirin. Têkildarî mijarê endamê Komîtiya Kampanyaya Alîkariyê ya Ji Bo Rojavayê Kurdistanê Sabîr Ebdullah anî ziman ku wan bi hevkariya qaymeqam, hêzên ewlehî û hinek rojnameger û çalakvanen sivîl kampanya daye destpêkirin. Ebdullah got ku kampanya ev 4 roj in dom dike û pêwîstiyên zarokan, pere, xurek û tiştên di nava malan û derman tên komkirin. Ebdullah da zanîn ku alîkariya tê komkirin jî dê radestî Heyva Sor a Kurdistanê bikin. Ebdullah diyar kir ku gelê kurd gelek piştevaniyê dike û keyfxweş in ku alîkariyê didin Rojava.
BAWENÛR
Li bajaroka Bawenûr a Kelar ê jî ji bo alîkariya bi rojavayê Kurdistanê re kampanya hate destpêkirin. Alîkarî li bazara Hewçerxî ya bajarokê tê komkirin. Komîteya kampanyayê bang li welatiyan kir ku weke helwestekî niştimanî piştgiriyê bidin rojavayê Kurdistanê û beşdarî kampanyayê bibin. Endamê Kampanyayê Hejar Sofî aşkera kir ku heta niha nêzî 20 ton xurek û tiştên din hatine komkirin û got ku dê kampanya heta çend rojên din bidome.
