Jinên Helebê gotin ku ew li ser rêya şehîd Hevrîn Xelef bimeşin heta ku bigihîjin Sûriyeke demokratîk a pirreng
Endamên Buroya Jinan a Partiya Sûriyeyê ya Pêşerojê şaxê Helebê û gelek jinên rewşenbîr û endamên saziyên sivîl ên bajarê Helebê kom bûn û rewşa dawî, êrîşên artêşa tirk a dagirker û hedefgirtina sekretera giştî ya Partiya Sûriyeya Pêşerojê Hevrîn Xelef nîqaş kirin.
Civînê ku bi rêzgirtinê dest pê kir, Buroya Jinan a giştî di partiyê de daxuyaniyek da.
Daxuyanî ji aliyê endama buroyê Suheyle Birîm ve hate xwendin û behsa rola jinan hat kirin û soz dan ku dê heta azadiyê ji bo avakirina Sûriyeya pêşerojê bimeşin.
Paşê seroka buroya partiyê li Helebê Xalîde Ebdo li ser jiyana şehîd Hevrîn Xelef axivî û diyar kir ku şehîd Hevrîn her tim amade bû ku Sûriyeyeke pirreng ava bike.
Ebdo bi bîr xist ku şehîd Hevrîn di bilindkirina asta jinan de û ji bo azadiya hemû jinan dixebitî.
Di dawiya axaftina xwe de Ebdo diyar kir ku hedefgirtina Hevrîn Xelef ji aliyê dagirkeriya Tirkiyeyê û çeteyên wê tenê bêhêzbûna wan li pêşiya jinên Sûriyeyê yên azad in.
Paşê beşdaran dengê şehîd Hevrîn Xelef guhdar kirin.
Hêjayî gotinê ye ku sekretera giştî ya Partiya Sûriyeyê ya Pêşerojê Hevrîn Xelef di 12`yê Cotmehê de ji aliyê komên çete yên dewleta tirk ve hate qetilkirin. HELEB
