Xebatkarên tenduristiyê yên rojavayê Kurdistanê diyar kirin ku hejmareke zêde ya sivîl û birîndaran li Serêkaniyê ye û di xetereyeke mezin de ne. Xebatkaran bang li qada navneteweyî kirin ku korîdoreke mirovî vekin da ku sivîl û birîndar bên rizgarkirin
Êrîşên qirkirinê yên dewleta tirk ên li dijî rojavayê Kurdistanê didomin. Di encama êrîşên qirkirinê de heta niha zêdetirî 235 sivîl hatin qetilkirin û zêdetirî 677 sivîl jî birîndar bûn. Yek ji navendên ku herî zêde şehîd û birîndar lê hene jî navçeya Serêkaniyê ye. Lê ji ber ku navçe ji hêla hêzên dagirker ve hatiye dorpêçkirin, komên tenduristiyê nikarin bikevin navçeyê û birîndaran xelas bikin.
Têkildarî mijarê hevseroka Heyva Sor a Kurd Cemîle Hemê axivî û diyar kir ku bi dehan şehîd û birîndarên sivîl di Nexweşxaneya Serêkaniyê û malan de asê mane. Hemê anî ziman ku wan karî tenê 30 birîndar û 4 şehîdan ji nexweşxaneyê derxînin û wiha dom kir: “Me li Serêkaniyê serdana gelek cihan kir. Diyar bû ku dewleta tirk a dagirker raste rast bi zanebûn sivîlan hedef digire. Em bang li rêxistinên mirovahiyê dikin ku erka xwe ya mirovî pêk bînin da ku korîdoreke mirovî bê vekirin û birîndar û şehîd ji wir bên derxistin.”
Hemşîreya dilxwaz bang li cîhanê kir
Yek ji xebatkarên tenduristiyê jî Mary Francis Rosen. Rosen hemşîreye û vî karî bi dilxwazî dike. Rosen ji bo rewşa li Serêkaniyê wiha dibêje: “Tevî proseya rakirina birîndaran jî li Serêkaniyê hejmareke birîndaran heye. Pêwîstiya wan a lezgîn bi dermankirinê heye. Ez di nexweşxaneya Serêkaniyê de dixebitîm û niha li navçeya Til Temirê me. Jiyana birîndarên li Serêkaniyê di xetereyê de ye. Ez bang li qada navneteweyî dikim ku korîdoreke mirovî bê vekirin da ku ew sivîl û birîndar bên rizgarkirin.” HESEKÊ
