Citkarê ke silqok û kartolan ramenî dîyar kerdî ke vayeya gubre, mazot û ceryanî vera xeylê zehmetî ancenî û wina vatî: “Ma zehmetî ancenî la tu qezencêk çin o.”
Vayeyê ke virazîyenî tesîrê xo danî her beşê komelî, esnaf, citkar û hemwelatijan ser. Citkarî û heywankarî vayeya mazot, gubre û ceryanî vera ameyî ver bi çinbîyayîşî. Taxa Koyenderî ya qezaya Pasînî ya Erziromî de citkarê ke silqok (pincarê şekir) û kartolan ramenî bale antî vayeya mazot, gubre û ceryanî ser.
Citkaran ra Suleyman Korûcûyi ard ziwan ke her serr 50 donim erd ser de kartolan ramenî, labelê emserr vayeya mazot, gubre û ceryanî vera tena 5 donim ramito. Korûcûyî dîyar kerd ke wexto ke kartolan ramenî toximan 4 lîre ra herînenî, labelê vayeya kartolan 1 lîre ya û va: “Heqê ma nîno herînayene. Emserr seba her donimêk 2 hezar lîre mesref şî. Cok ra êdî ma nêeşkenî citakarî bikerî. Seba ke erdê ma bêwayîr û veng nêmano ma mecburî ramenî.”
Vera hende vayeyan de kîloya kartolan lîreyêk o
Citkar Îsmaîl Atmacayî zî qiseykerdişê xo de da zanayene ke emserr mehsul rizîya û wina va: “Dewlete toximê kartolan 4 lîreyî ra roşena û ma serê saetêk 40 lîreyî ra awa sontajî dewlete ra herînenî. Cereyan zaf vaye yo. Tonêk gubre 3 hezar tl yo, lîtreyê mazotî 6 lîre yo û saetêk cereyan zî 40 lîre yo. Vera hende vayeyan de kîloya kartolan lîreyêk o. Ma no heq o? Ma her hawayî ra zehmetî ancenî.”
Recep Akdag weçînayîş de soz da la pê nêard
Citkar Salih Tiryakîyo ke silqokan rameno da zanayene ke emserr huşkîya varanî vera se ra 40 kêmî virazîya û wina dewam kerd: “Dewa ma de 150 keyeyî estî. labelê tena 5 keyeyî silqokan ramenî. Vîşêrê citkarî sewbîna alternatîfêk ma çin o. Ma qezenc bikerî zî nêkerî zî ma mecburî erdê xo ramenî. 18 serrrî yo ke no hukmat kar ser de yo. 18 serrî yo ke weçînayîş ra heta weçînayîşî soz danî. Parlementerê AKPyî yê Erziromî Recep Akdag weçînayîş ra ver ame herême û dewan û va ‘Do 400 rojî ra dima meseleya awe bêra çareserkerdene.’ Labelê şîyayîş o şîyayîş o. Reyna çimê ma nêgina ci.”
Tîya ra pê ma rayan nêdanî AKPyî
Citkaran ra tewr peynî Mahmût Tiryakî qisey kerd û va: “Êdî ma sozanê AKPyî yê weçînayîşî ra aciz bîyî. Awa belaş daxî bi pere danî. AKP her weçînayîşî de yeno ma xapêneno û rayan herîneno. Labelê badê weçînayîşî kişta dewe ra daxî derbaz nêbena. Tîya ra pê ma rayan nêdanî AKPyî.” ERZIROM
