Berpirsê Têkiliyên Derve yê HSD’ê Rêdûr Xelîl da zanîn ku dewleta tirk û çeteyên wê ji sê aliyan ve êrîşeke dijwar li dijî hêzên wan daye destpêkirin û agirbest binpê kiriye. Xelîl bang li DYA’yê kir û got ku garantora vê agirbestê ew e û divê êrîşê bide sekinandin
Berpirsê Têkiliyên Derve yê Hêzên Sûriyeya Demokratîk (HSD) Rêdûr Xelîl bi daxuyaniyekê ragihand ku tevî agirbestê û lihevkirinên li herêmê jî hêzên artêşa tirk a dagirker û komên çete yên girêdayî wê êrîşên xwe yên li dijî rojavayê Kurdistanê didomînin.
Rêdûr Xelîl diyar kir ku dewleta tirk a dagirker li rojhilatê Serêkaniyê ji gundên Menacir, Esediye û Mişrafê êrîşeke berfireh daye destpêkirin û wiha domand: “Ji ber vê yekê jî li vê herêmê şereke giran heye. Dewleta tirk li gel çeteyên xwe bi van êrîşan agirbestê binpê dike. DYA ya ku garantora vê agirbestê ye, divê demildest van êrîşan bide rawestandin.”
